【士㞗彈系列】《她被寄宿到鹽水男孩的家中》2K15中: 2K29

A：「啊，原來妳係住喺呢度。」妖，上車嗰陣咪講咗個目的哋出嚟囉，咪扮聽唔到好唔好，我未至於係嗰啲為咗隱瞞自己屋企喺邊而專登報遠幾條街嘅人。
我：「你唔係為咗想知我住邊而陪我打的呀？」
A：「先無咁無聊，但瞭解下妳哋嘅生活都幾有趣。」
我：「係咪好失禮你，我無佢哋幾個咁大富大貴。」
A：「唔係呀，住呢度都幾好吖，起碼叫做有海景。」
我：「我以前住喺後面車行街啲舊樓㗎咋。」
A：「原來係咁，唔怪之得妳咁好打啦。」
我：「我想問下兩者有乜關係…」
A：「諗緊可能會有車房仔尾行再性騷擾妳，然後妳打走佢哋，哈哈。」
我：「唔會啦，好多年前，嗰陣我重好細個…喂，你做乜揀搭的士返嚟呀，咋一聲就到咗。」




A：「做乜呀，咁快就唔捨得我嗱？」
我：「唔係…呢幾個月嚟，關於呢件事，全靠你嘅幫忙先成功，想再一次多謝你啫。」
A：「無乜嘢，我都係嚟望下靚女，抽下水啫，唔使感謝我喇，重有唔好以身相許，我受唔起。」
我：「點解你對住女仔可以咁唔認真？」
A：「認真嚟做乜？等妳鍾意我？咪攪。」
我：「先無咁易呀，但你身邊重有其他女仔㗎，咁樣對佢哋嚟講唔係好事。」
A：「吖，我使唔使輪到妳嚟教訓我呀，妳咪見得佢哋嗰一次咁大把，同埋妳點知我對佢哋唔認真呢？」
我：「我想講嘅係，玩弄女仔感情嘅男仔係唔會有好結果…」我都未講完條仆街又攬住我嚟惜。
點解…其實幾舒服；係咪因為咁所以易汪佢哋先…
A：「妳有無覺得我玩弄妳感情？」




我：「咁又無嘅，你係蝦晒我哋所有女仔啫。」
A：「見妳咁唔捨得我有屋企都唔返上去，就坐低同妳講下啦…其實我都年輕過，純情過，亦都同其他所有男仔一樣有段傻下傻下嘅初戀。」
我：「係咪呀？唔多信囉，好歹你生得一副男神樣。」
A：「嘩，好彩妳識得形容我係男神樣，如果妳話我係渣男樣就即刻渣俾妳睇。」
我：「唔使，我已經覺得你好渣下。」
A：「妳對波我都重未揸，咁快就覺得我渣？」
我：「咪玩啦，我對波有乜好揸，快啲繼續講。」
A：「正如妳所講，我個樣係OK嘅，家境都OK，讀書成績唔錯，又入咗間男女校，如妳所料大約中二三開始就有唔少女仔黐埋嚟，唔怕同妳講埋我學校都幾出名，所以迫得我哋都幾緊，攞好成績之餘重想啲學生玩好多課外活動幫學校攞奬，所以我除咗玩音樂之外，重打過辯論同參加STEM比賽，運動低能嘅我亦迫不得已打下羽毛球校隊嘅後備，差唔多日日喺學校搞到六七點，自自然然就會同好多女同學有接觸。」