【士㞗彈系列】《她被寄宿到鹽水男孩的家中》2K15中: 2K46

Q：「唔係，佢level太高，變咗佢玩我，以佢資質玩一晚開心唔難，但好難長玩長有，我要準備直播喇，你乖乖地上床打機…或者溫下書啦。」
既然佢要直播咯，我梗係同個傻仔跑步啦；留喺屋企望住佢又唔係…唔望又唔係，但好似我咁日日睇到佢飛釘底衫褲，都唔知重睇佢著黑絲嚟彈琴為乜。
對住健仔就更唔自在，佢係扑咗嘢同更加鹹濕，不停將啲器官同性話題掛喺嘴邊，但唔見有幾大長進，所以話呢，屌女係唔會令一個人進步嘅，否則點解有咁多人要叫足成世雞呢，就算呢個聖誕佢扑多半打女都唔會變團長。
健：「喂，畀啲得意嘢你睇下。」唔會又係欣姐嘅…
瘟：『哈哈，估唔到我IG開咗咁耐以嚟最多like嘅post，竟然唔係因為自己…』係佢嘅自我回覆，上面就係琴日我幫佢同QQ影嗰幅合照，三位數like多啲…
我：「哦，同我有乜關係呢？」係我揸機囉。
健：「吖，你咁唔緊張嘅，就係知你沉佢先好心走嚟提醒你咋，難得女神上台但就俾佢攞晒彩，你知唔知出面啲人點講呀，話你俾Q玩殘晒所以就投靠Y，然後瘟神就假借社長嘅名義嚟同內閣死灰復燃…」
我：「建議你唔好睇咁多電視劇，我自己就係喺個旋渦嘅正中心，唔通啲街外人會清楚過我喇喎，都黐膠花。」
健：「嗯…但瘟神冧你女神都係一個不爭嘅事實嚟，如果你闊佬懶理難保有一日會為咗自己嘅輕率而後悔。」
我：「多謝關心，但社長唔會影響到我哋喇。」




健：「就算唔係佢，都重有好多其他對手㗎，你知唔知啲地下group全部喺度幫啲女神整緊排位，如果你真係重視女神就落力啲啦，我都係全靠堅毅不屈先可以同阿欣喺埋一齊，你每日嘅表現女神都會睇到㗎…」
真係聽到想講屌你老母！係呀，女神，甚至乎女神們都係睇到我嘅表現，係你睇唔到咋嘛；再者，你堅毅不屈？如果唔係QQ好心幫你你會有今日？
我：「喂！我係同Q保持住非常良好嘅關係，亦非常欣賞佢，但係在公在私在明在暗我從來就無話過要追佢，如果要追佢我重會唔會黐埋去其他女仔度呀？同埋你唔好唔記得人哋係有男朋友㗎，我先唔會做埋晒啲缺德嘢。」
我覺得呢，QQ係寧願我可以成個浪子咁多過向佢表明心跡，因為咁樣先容易有彎轉，方便我哋可以長期咁朝夕相對；掉轉嚟講，如果QQ要我做佢男朋友我根本唔知點算，無論外表定係內涵我無一樣嘢係襯得起佢，實俾街外人講得更加肉酸，而且亦負擔唔起佢渴望嘅生活。
健：「明嘅，但印象分呢樣嘢女仔係睇得好重㗎，唔係叫你追佢，但你都可以表現得上心啲，對佢好啲。」
我：「我可以點對佢好呀！幫佢買返圓方上面個單位呀？」QQ一直唔肯講佢以前屋企嘅exactly屋苑名，大細同金額，只係從佢口中聽過住得好舒服，海景優美，有書房同工人房，我唯有推敲係一個至少一千呎嘅高層單位，即係現價唔會低過二千…五百萬？