【士㞗彈系列】《她被寄宿到鹽水男孩的家中》2K15中: 2K47

假設我尚算生性搵月入中位數兩萬到，唔玩唔食唔使交稅一蚊都唔使，一年有廿五萬，四年有一百萬，大概八十年就有二千萬買返將來貶值咗嘅單位，再同QQ一齊九十幾歲同地球講再見！
健：「咁…總有啲小事可以做嘅。」
我：「咪出咗嚟同你跑囉，佢都鍾意啲健康嘅男仔。」
健：「嗯，預祝你今年跨欄可以挑贏瘟神。」
屌，佢係咪講少句嘢會死㗎，完全唔明欣姐點解會忍受到佢…話時話，會唔會韻婷都喺度忍受緊阿康呢？雖然唔關我事，而細蚊就已經忍受完我。
差唔多返到去嗰陣收到QQ電話，原來係佢今日營收唔錯所以想外賣壽司返去食，用佢嘅app，而我就負責做外送動物…係嘅，我絕對有無數嘅小事可以為佢做，如果做到佢成世嘅專屬外賣員都唔錯，久而久之…熟咗咯，佢可能會捉埋隻動物入去一齊開餐，再食埋佢！
講食嘅話，咪應承咗會做愛囉，都唔知重諗嚟為乜…
去到嬲嬲樣壽司攞貨嗰陣望下張單，見到雖然有自取六折，但都要兩嚿幾水，好彩晏晝食得超級平。
Q：「知你麻麻地魚生，所以幫你嗌咗和牛啦，鰻魚啦，甜蝦，布包重有太卷。」雖然點計都係叉雞飯抵…
我：「真係瞭解我，多謝妳嘅關懷。」




Q：「梗係啦，見到你下面條嘢扯扯下就知你諗緊乜。」其實佢係講笑，因為我跑到散晒根本無力扯。
我：「身水身汗，我入去沖個涼先！」
Q：「快啲呀！等埋你先一齊食。」我成日凝住佢內心有加咗老公兩粒字喺後面…其實咁樣相處已經好夠，要我追佢或者做男朋友實在係倒瀉蘿蟹。
Q：「欸，你聽日得唔得閒呀？」
我：「作為一個毒撚，我幾可星期日有約喎。」要有嘅話唔係話唔得，但唔想佢覺得我出咗去溝女。
Q：「聽日…我同易汪行街，你有無興趣一齊？」
我：「得妳兩個？做乜搵埋我嘅？」
Q：「我哋要去買班長嘅生日禮物，所以唔會搵埋佢。」
我：「咁幽蘭呢？Zilvia呢？」
Q：「你唔係諗住幽蘭重有得出街呀，至於Zilvia要帶狗，本身都有諗過同佢一齊帶完再出，但佢隻狗又要沖涼吹身會變得好趕，所以就算嘞。」




我：「咁點解又搵埋我嘅？」
Q：「吖，咁你想唔想一齊吖，唔想就算！」
我：「如果妳想我現身嘅話，我實會出㗎喎。」
Q：「得我同佢氣氛無咁好，有你喺度我哋可以一齊蝦你。」點解女神明搵人笨可以講得咁直接嘅呢？
我：「咁我出囉…妳會同佢講我聽日跟埋嚟？」