【士㞗彈系列】《她被寄宿到鹽水男孩的家中》2K15中: 2K50

據我所知，朗豪坊隔籬有個旺角街市，嗰度啲下午茶同碟頭飯抵食到得人驚，不過…佢哋唔會去呢啲地方啦；其實每次跟住佢哋行街都會有啲唔自在，雖然已成習慣。
果然…佢兩個走咗入去對面街嘅一棟高級建築物，應該係酒店嚟…但位處旺角應該唔會貴得去邊？
兩個淑女孭住個手袋仔行得好自然，唔使人帶路就自己搭（車立）嚟到五樓嘅西餐廳，非常輕鬆咁同門口個姐姐講咗三位就跟住入，又的確，呢度氣氛係輕鬆過上次同QQ飲茶好多，可能古典嘢係比較講禮儀。
我哋坐低咗喺一張比較細嘅矮圓枱，或者叫茶几係比較合適，圍住三張現代風格嘅梳化；周圍嘅人望落比較後生，都係有講有笑，感覺上我哋就顯得無咁異類。
其實係得我一個異類咋！兩個死妹釘分明成日嚟呢啲地方…更加唔使講嗰位千金大小姐。
Y：「我哋唔使揀㗎喇，你望下個主餐牌睇下有乜啱食，最衰啱啱過咗lunch hour，你當蝕杯嘢飲囉…嘻嘻，妳睇下人哋幾鍾意妳吖，開心到將個頭像變成同妳嘅合照，好心妳就唔好拒人於千里之外…」八婆mode已開始上演。
鬼得閒理嗰個姓瘟嘅，好彩塊餐牌重有得中英對照，薯條一百有找，水牛雞翼六隻百五多啲，係咪可以理解做平過前晚碟焼地鶏？但我無理由食呢啲嘢㗎，主菜相對簡單，炸魚薯條，大蝦意粉加一過二百，長通粉我唔鍾意食，呢個鐘數又無理由鋸塊三嚿幾嘅扒…頭痛。
Y：「咦，原來個tea set平過上次喎，竟然四百有找，經濟係咪真係咁差呢？」再食呢啲嘢我同QQ就肯定係。
Q：「佢呢啲期期換款嘅啫，咪將貨就價畀唔同材料妳…你唔使咁苦惱喎，今餐唔使你出，你娘娘好惜你。」
Y：「閘住，我唔再係佢娘娘喇，不過你想食乜就嗌啦，我哋會夾份包起你。」呢兩個女仔究竟當我係乜？




如果同易汪一對一我當然唔怕食窮佢，但問題係QQ要夾一半，原理上即係我要用返自己啲錢，亦可以理解成有得半價食酒店嘢，但問題係我本身無呢方面嘅需求。
Q：「不如食和牛漢堡啦，幾好食㗎，呢個價位嘅扒唔值得你嘥力去鋸。」要串起上嚟QQ仍然係一個高手。
我：「咁就聽妳話要呢個啦。」
Y：「真係一試就知邊個係主人，咁飲乜呀？」
我：「唔使喇，飲水就得，邊好意思要妳哋破費。」高級西餐廳當然自帶檸檬清水，又唔使收茶位。
Q：「唉，你好同佢慳嘅，一百幾十猶如垃圾啦。」
Y：「妳話自己咋，我個Chloe係妳個一半都唔使呀。」
我：「兩位女神稍安勿躁，總之小弟非常多謝妳哋就係…」都唔知佢哋係咪專登咁樣先安樂。
然後佢兩個就點餐，佢哋份tea set重跟咗兩杯無酒精雞尾酒，即係mocktail。