【士㞗彈系列】《她被寄宿到鹽水男孩的家中》2K15中: 2K53

而佢兩個杯飲品，YY嘅係唔知橙溝乜嘅橙色，QQ嗰杯就係士多啤梨嘅紅，擺到明兩朵花喺度爭豔鬥麗，為乜呢…得我喺度又唔會理妳哋邊個靚啲嘅。
Q：「有啲掛住團長枝酒，佢真係沖得好好飲。」
Y：「先隔得嗰一日，妳咁快就掛住人哋嗱？」
Q：「我想澄清一下，我有興趣嘅係佢沖出嚟嗰杯嘢，而唔係佢個人，我唔同妳。」
Y：「係咩，嗰日睇住妳擒低佢個樣都不知幾狼死。」
Q：「哦，劇情需要啫，妳知我平時都唔會做埋啲咁嘅嘢。」係…佢會閹我同㩒低我打我pat多啲。
Y：「原來係咁，難為交叉仔睇住妳不知幾咁陰功。」
Q：「有無呀，做乜要羨慕人呢？惜返啖嘞。」佢伸個嘴埋嚟，妳哋食嗰啲就話攝牙罅都唔夠，我食緊嘢㗎…
不過我梗係乖乖吞咗啖包，掂咗佢嘴仔一下。
Y：「都唔知妳兩個係乜關係。」




Q：「普通朋友囉，妳自己咪又係咁，好意思話我嘅。」
Y：「無，我當零成本玩下仔，唔使太過上心。」
Q：「話時話，妳重冧唔冧團長㗎？」
Y：「欸…點講呢，佢喺我心目中當然重係好好啦，但隔咗咁耐一早已經攤凍晒，我又有男朋友咯，如果…要玩下係可以嘅，但已經唔會再有嗰種心動嘅感覺。」
Q：「明嘅，知道佢而家咁嘅款的確好難心動到，我諗同妳初初識佢嗰陣實好大分別。」
我：「欸，妳開口埋口就話同人哋玩會唔會唔係幾好？」
Y：「收皮啦你，你唔係有女埋身就照單全收？」
我：「事實上又未至於嘅…不過妳好歹都係女仔嚟。」
Q：「家陣係咪性別歧視呀，呢度女多男少幾時輪得到你嚟出聲，食你嘅包啦。」就算一對一都唔係我出聲啦…
食食下，佢兩個又幫手瓜分我個包，好彩我有聽QQ話出門口之前有煮嘢食；另外我又飲下佢哋嗰兩杯口水尾，不過不失啦，甜甜地有啲果汁味，再加少少汽咁。




Q：「係喎，嗰個乜鬼聖誕夜攝活動，到時點㗎？」
Y：「妳少擔心啦，以妳資質隨便企喺度已經係個合格嘅model。」
Q：「我唔係擔心呢樣…咁服飾呢？化妝呢？」
Y：「服飾就…佢哋搵緊兩套合適嘅聖誕女郎裝，不過唔使驚，會問過我O唔OK先，始終學校活動嚟，唔會走光，唔使露乳溝，如果妳鍾意可以露下個肚仔嘅，化妝方面就無㗎喇，妳都知嗰日淨係會得班麻甩仔去，自己搞掂囉，普通晚妝就得，可以重手少少，到時互相幫忙咁。」
Q：「我掉返轉好驚佢哋太保守搵埋啲好老套嘅衫，到時長裙搞到我女巫又或者聖誕老人紮糉咁我唔影㗎。」