【士㞗彈系列】《她被寄宿到鹽水男孩的家中》2K15中: 2K56

Q：「如果我有Hermes收，唔介意送返真Omega㗎。」
Y：「標準款成六位數㗎，送條絲巾畀妳可以考慮下。」
Q：「呢啲嘢同放嚿現金喺度無分別，當投資啫。」
兩個死港女，無幽蘭呢種家底又想過呢種生活，賣身都夠賣到妳下半身癱瘓。
食完個尚算幾好味嘅漢堡包，我哋又過返去對面街嘅朗豪坊，嚟到一間Swatch嘅專門店，門面的確係迎合後生仔嘅，唔似係賣名牌嘢，好過陪佢哋行周生生同謝瑞麟。
Y：「唔該，喺網上面預約咗隻Uranus錶。」原來呢個世界有隻錶叫天王星，咁樣送禮物都幾方便喎。
「嗯，Yvonne你好呀，請等一等。」
過咗一陣，位姐姐攞咗個粉藍色盒仔出嚟打開，入面係一隻粉藍色撞白圈嘅手錶，錶面同錶帶都印住大大隻OMEGA字樣，衰鬼，又真係幾似一隻塑膠版嘅名錶。而且暴力女班長又真係鍾意著埋呢啲顏色嘅底衫褲，我諗呢兩個好姐妹係無理由唔知嘅，佢哋鬼死咁鹹濕。
Y：「OK㗎喇，唔該幫我包起佢啦。」
我：「嗯，遠睇又真係幾似一隻年輕版嘅歐米茄。」




「先生係咪鍾意？呢個系列重有好多款唔同顏色嘅，大部份都有現貨喺度，使唔使攞畀你睇下？」
我：「呀…唔使喇，麻煩晒妳。」
Q：「其實，我知你買得起嘅，鍾意咪睇下囉。」
我：「唔使喇，我有電話入面嘅小時鐘已經夠晒。」
Y：「之前啱啱出嗰陣好多人嚟排隊買㗎，啲顏色靚嘅又斷晒貨…乜你唔係有打工嘅咩？二千蚊多啲一隻錶無理由畀唔起嘅，做乜要咁糟騭自己？」死八婆明知故問…
我：「我啲錢要攞嚟食飯㗎，同埋要儲錢。」
Q：「望落你平時都無乜錢要使吖，唔通…要課金落小妹妹度？定係小姐姐？」係小妹妹！妳細過我嘅。
Y：「話唔埋真係，日日喺我哋隔籬有得睇無得食，身體機能遲早失衡，唯有買返啲女仔服務嚟補救下。」
我：「先唔會呀，就算真係咁有需要，咪搵EX先囉。」
Y：「哦，有人講到出口喇，睇下你幾仆街吖，又唔要返人哋，但就搵人嚟發洩，Queenie果然無話錯你。」




我：「但係…如果雙方自願，應該…唔係好過份啫，同埋我講下咋嘛，暫時嘅我未有餓到咁。」
Q：「你如果再餓啲，我哋重邊敢放你喺身邊。」
十分鐘唔使，易汪攞咗二千一百蚊出嚟埋單就買完隻錶。
如果我無記錯，佢哋啲禮物就係大約呢個數，QQ枝壞女孩香水，而Zilvia粒史奴比鍊墜就貴些少。
Y：「奴才，攞嘢喇。」講真佢啲態度係頗為惡劣嘅，不過有得惜惜另加眾多福利，我唯有習慣成自然。