【士㞗彈系列】《她被寄宿到鹽水男孩的家中》2K15中: 2K57

我：「咁…我哋今日係咪完成任務喇？」一個對住佢兩個，而且又喺MK，無乜嘢做到就不如早啲返歸算。
Y：「未噃，而家要去攞第二份禮物。」
我：「乜重有㗎？唔通一隻錶都重唔夠？」
Y：「隻錶又唔係啲乜貴嘢嚟，買多少少其他嘢補數。」
我：「原來真係有預設金額㗎，要幾多先夠？」
Y：「又無定死嘅，我哋中二開始交換禮物，嗰陣講過每人夾五百左右，咁而家我哋大個咗，再加埋啲通漲…」
Q：「同埋我哋多咗個人吖嘛，都要配合下幽蘭。」
Y：「呢份禮物就係幽蘭提議嘅，搵得我幾辛苦呀。」
我：「啊，係乜嘢嚟㗎？」
Y：「去到你咪知囉。」




我：「咁我哋而家去緊邊度？」彌敦道去尖咀方向。
Q：「信和中心。」即係傳說中嘅四樓有四仔，自從所有嘢擺晒上網之後已經絕跡，我小學後期已經無再見過翻版碟呢樣嘢，最後接觸嘅就係老翻PS3碟。
我：「乜妳哋咁潮㗎咩，同埋…點解我要企喺妳兩個中間？」但又要留返條罅，兩邊對稱咁樣。
Y：「好簡單啫，如果你企近我呢邊，萬一撞到我條仔點算？而家咁樣就可以話你係佢條仔。」
我：「但如果我係佢條仔，點解妳唔係企喺佢側邊而係企喺我側邊呢？好似唔多合理。」
Q：「嗯，通常啲綠茶就係咁樣企法。」
我：「但係我哋而家對稱㗎喎，即係妳都係綠茶？」
Q：「唔好黐咁埋呀！陣間撞到我條仔都唔知點算。」
我：「妳哋兩個嘅男朋友…互不認識㗎可？」
Y：「當然，點可以俾呢件咁恐怖嘅事情發生呢。」




其實做佢哋條仔都幾慘，主導唔到佢哋之餘重要乜都唔清唔楚，一有乜嘢事就用屋企同學校嚟做托詞。如果要數最清楚佢哋嘅男仔，我可以話係當之無愧，結果我哋就係咁樣一王兩后模式行到去信和中心。
然後上扶手電梯，好似去咗四樓，易汪轉來轉去跟住鋪號終於搵到佢要去嘅鋪頭。
Y：「你好呀，麻煩訂咗Uranus同Neptune嘅figure。」
「哦，原來妳就係易汪，等等呀。」鋪頭入面得一個油脂死肥宅，即係望落唔走去叫雞就要做成世處男嗰種，好聽啲嘅話可以尊稱佢哋做魔法師。
本來見到靚女係要望多兩眼嘅，但因為我企咗喺中間，個死肥宅瞬間就轉為充滿殺意嘅眼神望住我。
然後佢就喺幅紙盒牆搬咗兩盒嘢落嚟收銀枱面。
「自己check啦，兩盒全新未開。」全新未開其實唔等於新，喺玩具界術語每一粒字都有特別含意，由於我間唔時都會睇下LEGO，當然知呢個世界除咗有六邊形戰士重有八角魔人。