【士㞗彈系列】《她被寄宿到鹽水男孩的家中》2K15中: 2K58

正如細龜唔會同我哋討論乃木坂一樣，個店員一眼就知我哋唔係佢個世界嘅人，所以講多兩句都嫌嘥口水。
兩個女仔喺度隔住塊透明膠檢查公仔，我都費事阻住佢哋，所以行開咗去另一邊睇高達…而家啲高達五花八門，有越嚟越認真嘅超合金，又有Hello Kitty高達。
嗯…露底嘅拉克絲都唔錯，正一臭雞，夠晒淫，又要扮矜貴，唔知似邊個女仔呢？
Y：「喂，細路，埋咗單喇。」佢拎住兩個大膠袋。
我：「哦，其實呢兩隻嘢幾錢㗎？」純粹想八下。
Y：「千五蚊兩隻…喂，雖然呢啲嘢幾錢唔難搵，但唔該你唔好喺班長面前提起呀。」
我：「當我傻嘅咩…不過妳哋都幾無聊，識咗咁耐重計較埋呢啲嘢…但問題係，送天王遙畀佢好易理解，點解又買埋海王美智留呢？」雖然睇過卡通就知佢哋一對。
Y：「因為拆開嚟買貴啲囉，Neptune拉小提琴㗎，你唔覺得我似佢嘅咩？」
我：「妳都咁講…重邊有得唔似，但其實班長都唔似天王遙，又唔係短頭髮，係都似木野真琴多啲。」
Q：「嘩，你唔好俾佢聽到添呀，驚你俾佢打死。」




我：「唉，無計，鬼叫我技不如人，但佢識呢啲㗎咩？」
Q：「大路嘢，應該識掛，咁你覺得我似邊個美少女？」
佢無講係戰士，認真我覺得佢似三千院凪。
我：「妳嘅話，按道理應該係愛野美奈子。」因為美奈子其實最似三千院凪。
Q：「算你啦，幾驚你話我似月野兔。」
Y：「其實月野兔去到後期都好正㗎，無開局咁差。」
Q：「唔得呀，總之我唔係嗰隻低B兔啦。」
我：「不過…呢兩隻figure真係要七百五？好似貴咗…」
Y：「係呀，幾年前嘅crystal版嚟，一早斷晒貨，臨急臨忙咪食炒價都要買，差唔多double咗。」
我：「哦，係嘅…幾百蚊對妳哋嚟講濕濕碎啦，其實妳哋都幾幸福，每年有生日禮物收。」




Y：「做乜呀，你羨慕呀？我唔介意你join埋我哋㗎，咁就年年有禮物收，不過我哋是但一個生日你都要夾一份。」
我：「唔好喇，呢啲遊戲我玩唔起。」原理就會變咗我分五期供七百蚊，最後收到返三千五嘅禮物。
Q：「話時話，你都係今個月生日喎。」
Y：「奴才幾時生日，果然都係主人先最清楚。」
Q：「乜喎，朋友之間知道幾時生日好正常啫。」
Y：「咁呀，你係咪鍾意高達？我哋送盒畀你囉。」
我：「咁多謝呀，任我揀都得？」
Y：「唔通我哋揀咩，邊隻打邊隻都唔識分。」