【士㞗彈系列】《她被寄宿到鹽水男孩的家中》2K15中: 2K68

我：「係呢，妳哋啱啱落去…到底講咗啲乜呀？」
Q：「呢啲遲下再講啦，係咪好想俾其他人聽到唧？」
於是乎，全部同學就一齊預習同埋執書包等調位。
鄧：「好！我已經精心炮製完，一號同二號出嚟睇新位先，然後迫出嚟嗰兩個再去新位，咁樣就可以減少混亂又可以調好晒。」
周：「咁樣唔得㗎，如果有closed loop嘅話就會斷咗調唔晒所有人。」無嘢係可以呃到全級第一嘅法眼。
鄧：「係咩…但係我好似唔係幾明你講乜。」
V：「即係話如果AB同學出咗嚟，結果佢哋係互換位，又或者佢哋迫出嚟嘅CD同學係坐返AB位就會完咗，妳呢個方法如果要調晒所有人，就只可以容許全班同學組成最多兩個loop，而一開始嘅兩個同學要分別喺各自唔同嘅loop，又或者全班只組成一個loop，假設老師你係任意調位，喺圖論嘅層面三十四人只組成單或雙圈嘅或然率其實一啲都唔高。」幽蘭講完周B開始拍手掌再蔓延其他仔…
鄧：「妳第一句係明嘅…但係就越聽越唔明。」
我：「唔緊要㗎，Miss妳係非戰之罪，教中文㗎嘛，剩係ABCD已經夠聽到一頭霧水，起碼要轉做甲乙丙丁啦。」
鄧：「你個死仔包…總之一二號出嚟先啦，停咗嘅話就是但兩個未調嘅出嚟啦。」




的確每次現場調位都係極之麻煩，因為櫃桶入面先係我哋嘅辦公室，有啲人甚至會想連枱凳一齊搬，其實我覺得最方便應該係放學睇新位，到第二日返嚟先調。
不過呢，咁樣慢慢褪有個好處，就係會增加驚喜或驚嚇。
F：「哎唷，你坐我後面呀？」
我：「咪玩啦，先唔信妳啱啱睇唔到。」
F：「又真係睇唔到，正常人都只係睇自己隔籬位嘅啫。」
我：「咁…又好似係，我行埋嚟先見到妳。」
豬：「開心啦，又有女陪你嘞，咁我走喇。」
J：「好彩，我只係對你呢幾分鐘。」
我：「唔係好差咋…我嘅實驗室好拍檔。」佢係無女神咁靚，但同男朋友都一齊咗好耐，所以幾好溝通。
J：「唔關事，係坐你側邊嘅話好大壓力，容乜易你啲好朋友話我爭玩具。」




我：「未至於係玩具呀，同埋上Lab都一齊坐㗎啦。」
J：「點同，我同你中間係隔住咗易汪，佢同Queenie咁好朋友就梗係可以分享玩具嚟玩。」
我：「雖然我唔同意玩具呢個講法，但妳都係佢哋朋友嚟。」而且最鍾意喺Lab講條仔壞話例如顧住打機。
J：「唔使客氣，我絕對知道你嘅危險性，所以…阿花，留返畀你慢慢享受嘞，不過記得要小心啲。」
F：「做乜咁講喎，係呢，邊個會坐你隔籬呀？」
我：「我隔籬…將會係妳嘅好朋友嚟。」