【士㞗彈系列】《她被寄宿到鹽水男孩的家中》2K15中: 2K73

小息後係英作堂，想死…最慘係作文要即日交，好彩識咗左右女神之後可以求佢哋是但畀幾句我都叫做有嘢交。
K姐好快寫咗四五行，然後唔啱心水又扠晒佢，咁又嘥咗一張作文紙，而我通常每年都會有半疊剩返。
K：『對住張白紙唔諗住交？』佢喺張廢紙上面寫。
我望下四周環境，諗下同佢傳紙仔會唔會唔係幾好，但後面兩個應該就唔會理我，前面嘅就喺度筆耕緊。
我：『放學前先再算啦…有辦法嘅。』
K：『認真問你，係咪鍾意Queenie？』
我：『認真答妳，係靚女我都鍾意…』
我望一望佢，似乎就對我嘅答案非常之唔滿意。
我：『包括妳。』加埋落去…是但啦，佢都算幾靚又姣。
K：『你話我聽對你嚟講係無損失，因為破壞你兩個又唔會益咗我。』




我：『好難講㗎，點知妳會唔會睇上我。』一路寫就想一路笑埋出嚟，加埋我E起棚牙嘅樣。
K：『咪玩啦！你估我係你前面嗰個咩？』
我：『有得爭先好玩㗎嘛，所以要同女神爭。』
K：『爭乜撚呀，又係你話佢有仔。』
我：『係呀，但重可以有後備位，有兵位嘅。』
K：『頂你個肺吖，句句都窒住晒。』
我：『咁妳係咪要追男班長吖，認咗先再講。』
K：『你係咪要追Queenie？你講我就講。』
我：『追條毛，人哋有仔都不知幾幸福，所以勸妳不如唔好太擔心，係妳就係妳嘅…除非…唔係。』佢想打我。
K：『你同佢咁好朋友應該知，Myth係咪冧佢？』




我：『只要作為一個正常嘅男性，都應該冧佢。』
K：『你好唔合作喎，小小面都唔畀我。』
我：『哦，妳又無著數畀到我，又話唔想同我坐，何解要問我咁多問題呢？我都係等妳放心啲，知我唔係冧妳。』
K：『有無辦法可以令你合作啲？我只係想知少少嘢。』
我：『都有嘅，將你電話入面認為最引到仔嗰幅自拍畀我睇，就話畀妳聽想知道嘅嘢。』因為諗起天王星電話。
K：『點』…『為之最引到仔？』
我：『好簡單啫，妳覺得條仔睇完會扯旗咪係。』
K：『你』…『平時都係咁樣同女仔講嘢？』
我：『一時時啦，就算對住女神「們」都可以係咁。』
K：『估唔到佢哋會容忍到你…』因為妳太低估我啫。




我：『好多嘢妳都估唔到，呀，講明先，係要妳部電話呢一刻狀態嘅相，同埋自拍係要有樣嘅，所以嗰啲海鮮大特寫就唔使畀我睇嘞，咁當然，妳部電話可以乜相都無。』
K：『你點知我唔係是但畀張你睇？』