【士㞗彈系列】《她被寄宿到鹽水男孩的家中》2K15中: 2K83

J：「大佬，我唔係呢種傻妹嚟囉…不過呢，之前未同佢復合返嗰陣有諗過同佢癲一次，叫佢約埋兄弟條女出嚟一齊玩。」該煨咯，到底我身邊啲女全部喺度攪乜？
我：「係咪諗住要贏人先要贏自己，正面對決等敵人知難而退？」
J：「敵乜鬼人呀，條女都無諗住換畫，純粹同佢玩下尋開心，不過…係想試下男朋友係咪好似口講咁鍾意我啫，如果喺床上面係咪會表現到出嚟，不過諗落佢係話鍾意同我拍拖嗰陣好純嘅感覺，所以…或者我嘅身體未必真係咁吸引，加埋個女仔大我咁多，我驚出到嚟會俾佢笑死。」妳純？咁幽蘭或者Zilvia呢啲叫乜。
我：「明智，玩得嘅大姐姐其實真係好恐怖。」
J：「係囉，今次同佢復合其實佢EX都有出力㗎…唔講先喇，得返十分鐘，快啲食嘢啦。」
明明上年嘅lunch重係三條麻甩仔打傳說，點解今年會變成咁？話時話我咪又係咁嘅款。
返到課室，我繼續對住一張白紙六行字…班女神應該去咗睇人剪接，而K姐同Myth亦都未返嚟。
F：「呢度係用for唔係用of㗎。」阿花雖然讀書唔叻，但係英文點都好過我一截嘅。
我：「其實呢啲就算用錯咗，大部份人都睇得明嘅。」
F：「梗係未必啦，有時爭一粒字意思就會唔同晒，呀，可唔可以借你張SQL工作紙嚟睇下？」




我：「嗱，呢度呀，不過我無試run㗎喎，唔肯定啱。」
F：「係呢，想問下…你聖誕節有無約呀？」
點算好，我單身寡仔就梗係無約㗎啦，亦唔介意聖誕節走去瘟女，問題係我唔知QQ個時間表係點，萬一到時佢問我去邊都唔知點樣答。呀…
我：「聖誕節無約女呀，但到時我晚晚都要打工會好鬼唔得閒。」呢個悲哀嘅事實成為咗我最好嘅藉口。
F：「可以早啲嘅，你唔介意陪下契妹㗎可？」
我：「唔介意嘅…但要陪妳做啲乜？」
F：「哼，你話呢？咁你邊日得閒就話我知啦。」
點解而家啲女仔咁霸道㗎…到底邊日QQ會唔喺屋企呢？又無理由問佢幾時要去喂仔…唯一肯定佢今個星期五晚去天王星生日會，但禮拜五晚我要返工，雖然呢個亦都可以係我擺脫契妹嘅藉口，如果唔係太夜喺條街度呢…
我：「點解K姐未返嚟嘅？妳哋無一齊食飯咩？」
F：「無喎，今日得返我同阿Cat，佢兩個無人性。」




我：「哦，原來係咁，妳咁講我就明晒。」所以約我…
K：「服咗你，過完成個lunch先寫多咗兩行。」返嚟了…
我：「妳理得我吖，妳開心完就得啦。」
好快幾個女神同先生都上埋嚟，然後又要上堂。