真·後現代末世純手寫校愛網小《交叉仔傳記》: 2K173

我：「男朋友想攪女朋友好正常啫，總好過佢唔想攪或者寧願攪其他女仔，一個稱職嘅女朋友本身就有雞嘅功能。」
「唔係㗎…我好惜妳㗎…嗚嗚嗚嗚！」
我：「因為唔使畀錢就有得做，梗係要惜返㗎啦…萬一女朋友唔開心嘅話，以後無得再做點算。」
「點同…嗚…妳係我女…朋友嚟…嗚…」
我：「所以咪肯同你做愛囉，等你唔使叫雞。」
佢繼續喺我大髀上面喊，喊咗好幾分鐘…我開始明白點解欣姐唔肯認健仔做男朋友但又肯同佢上床，點解團長身邊咁多女但又唔肯同易汪玩，點解我肯補償返G奶但佢都懶得出嚟見我。其實我真係唔想為咗性而煩惱，就等如無乜邊個男仔想為咗諗同女朋友食乜而煩，如果呢個世界省略咗一啲多餘嘅期望，好多嘢都會變得無所謂。
眼前呢個傻瓜，耗費咗好多心力嚟得到我，而我只係一句就應承咗交叉仔，咁又代表咗啲乜？
我：「冷靜返落嚟，係咪要繼續溫書喇？」
「我會…對妳好，肯唔肯原諒我？妳嬲緊我溫唔到書…」
我：「哦，即係嫌我繼續嬲，就會摧毀咗你嘅前途啦。」




「唔係…但我一諗到妳嬲緊，個腦就會諗唔到嘢。」
我：「唔嬲喇，你好好地讀書，陪唔到我就陪唔到啦，唔使特登抽時間出嚟，至於你鍾意攪我，我明白嘅，亦無乜特別，前日嘅事就算啦。」
「Queenie…我有樣嘢想問妳好耐，之前我朋友喺地鐵撞到妳同個男仔一齊，妳話係玩完活動一齊走，佢幫妳攞琴，但係妳…」
我：「我…點樣？你朋友睇到啲乜呀，可能誇張失實㗎，不過你都知…啲仔有機會就實黐埋啲㗎啦，唔通我又要好odd咁推開佢咩，人哋又無做啲乜…我同佢真係無嘢，最多下次會叫佢檢點啲。」我記得嗰晚喺車廂入面並無做出一啲太過份嘅舉動，橫掂啲豬朋狗友八公任佢噏都得。
「唔係呀…而係…我次次同妳去完旺角妳都會去尖沙咀轉車嘅，但係嗰晚妳係搭相反方向。」
我：「你而家問埋我啲咁嘅嘢，即係唔想和好嘅啫。」
「唔係呀…只不過係呢件事，煩咗我好耐…」
我：「你又唔係唔知我屋企個站寧舍了能嘅，兩邊差唔多啫…攞住部琴吖嘛…唔係美孚…定荔景轉方便啲咩？」
「但佢係話妳…上咗綠色去觀塘方向，我個同學其實無上車…定係妳想同我講搭錯車太子落返，又或者部琴其實係個男仔嘅…但妳應該從來唔會送男仔返屋企。」
死火嘞，一時讕叻舐嘢添，雖然呢個方向點都錯。




我：「因為部琴…放住喺佢屋企先，佢屋企近學校…佢係我同學嚟，我只可以講…我無背叛過你。」