真·後現代末世純手寫校愛網小《交叉仔傳記》: 2K175

「點解要咁…我做錯咗啲乜？」佢用對腫咗嘅眼望住我。
我：「錯嘅唔係你，當初我欣賞你追我嘅勇氣，當中嘅認真、忍耐、毅力，重有創意…例如嗰個超級難食嘅cake mix蛋糕…以男仔嚟講，你好過我EX好多，而我都唔想玩你，所以應承做你嘅女朋友，我鍾意拍拖，鍾意有男朋友，鍾意俾人惜，鍾意有人陪我，就算嚟到而家呢一刻，我都好樂意飾演你嘅女朋友，但如果你問我有幾愛你…實在係唔識答。」唔等佢畀反應，我就惜咗埋去。
有時覺得叉仔講得無錯，我同易汪就係老司機嚟…雖然每次都想打佢一鑊，明明佢都係得益者嚟；如果有男仔肯認真對自己，惜下佢，做返佢女朋友又有乜所謂喎，如果我係單身嘅話，睇怕社長早就已經做咗下一個受害者。
但偏偏就係好似團長呢啲仆街，先有辦法令我哋心動…唉，可能我真係好差，如果係天王星嘅話一定唔會發生呢啲事，佢實唔會俾一個無感覺嘅男仔掂自己。
我知道佢雖然好唔開心，但都有認真咁同我惜惜。
「多謝妳肯同我坦白…咁…我哋而家點算…」
我：「我諗…對而家嘅你嚟講，專心準備考試先係最重要，DSE成績一世㗎，雖然無話唔可以再考。」
「如果妳唔喺我身邊，我唔知自己可以點努力…我知道自己做得唔好，近呢年無乜時間陪妳，約妳兩次就有一次係為咗上床…對唔住，但我真係好想可以真正咁認識妳，妳可唔可以畀多次機會我？」
我：「邊有咁易…就算時間有得倒流，情況都唔會有乜分別，如果我會愛上你嘅話早就已經愛咗…」我對佢搖頭…
「如果妳離開我，重邊有心情溫書…」




我：「而家距離DSE重有四個幾月，你可以有時間慢慢適應，如果我哋繼續拖落去，到你臨考先嚟嘈嘅話會好傷，我唔想累咗你。」
「唔知道…考完DSE之後，我會唔會有機會再追妳一次？假如…妳到時重係單身嘅話。」
我：「傻嘅咩，到時你要準備升大學，大把嘢做大把嘢玩，重走嚟追返一個食到厭嘅女仔？」
「唔係㗎，點會厭喎，我真係鍾意妳，好唔捨得妳。」
我：「咁係你而家唔捨得啫，到時…你就會識到好多唔同嘅人，唔得閒諗起我㗎喇。」
「點會…喺我心目中妳就係咁完美同獨特，妳係我嘅第一個，永遠都唔會唔記得妳。」
我：「問你一個問題吖，你捨得成世人淨係食過我咩？」
「呢層…如果係為咗妳，我諗我接受到嘅。」
我：「咁我寧願你一直掛住我，好過一齊磨落去。」
「妳真係一個好叻嘅女仔，而且重好狠…」




我：「咁點吖，係咪唔鍾意我呢個衰人喇？」