真·後現代末世純手寫校愛網小《交叉仔傳記》: 2K204

V：「唔該…都唔知團長有乜咁好，明明係衰人嚟。」
Q：「個個都衰㗎啦！但起碼夠靚仔先，問妳吖，你寧願俾個靚仔掂吖，定係俾個無咁靚仔嘅掂？」
V：「我諗…我好似無乜感覺，我認團長係靚仔嘅，但我無心動喎，可能因為我無經驗啦，我最想…嘅就係，個男仔可以令我開心，永遠都無煩惱。」
Q：「開心要靠自己㗎，如果有個男仔可以令妳永遠開心，咁一早全世界嘅女都爭住要啦，係咪先？邊有咁簡單喎，所以首要考慮都係外表先，唔信妳可以問下呢條友，係咪靚女最緊要。」眼前兩個就係學校入面接近最靚嘅女仔，想我點答喎。
我：「第一眼咪覺得靚女重要囉，起眼嘛，不過如果相處落去，都要舒服，大家開心，個女仔先會靚㗎嘛，無人會想日日對住個黑面嘅女仔。」
Q：「哦，你係咪想講邊個女仔咁呀？」
我：「無啲咁嘅事，只係比喻嚟，妳好靚女。」
V：「但係妳明明有男朋友，重喺度諗團長，咁樣唔係好曳咩？」幽蘭，妳第一日識妳好姐妹咩…
Q：「有幾曳喎，我就唔信我條仔無諗過其他女嘞，同埋…男朋友都係攞嚟拍拖用嘅啫，我未至於沉到想同佢過人世，咁…我諗下其他仔唔係好衰咋，係呢，幽蘭妳有無鍾意嘅男仔呀？」
V：「我唔係喺屋企…就係喺學校，可以鍾意邊個？」




Q：「咁妳都嚟咗三個幾月啦，算係識咗唔少男仔。」
V：「無用㗎，屋企唔會俾我同其他男仔相處…而且妳講到個個男仔都又衰又鹹濕，好似佢咁…我唔鍾意俾人蝦，團長剩係識玩我，所以我唔鍾意佢。」我到而家都唔太明佢想點，相信佢對男仔無乜興趣，但又要走嚟搵我玩。
應該話嚟玩㞗我，可能喺佢眼中我係邪骨仔或者牛郎咁。
Q：「調完位隔籬嗰兩條仔呢，佢哋點呀？」
V：「唔知喎，雖然睇落正正常常，但都feel到佢哋喺度望我心口同對腳，有啲唔自在。」
Q：「唉，係嘅，的確條條仔都差唔多…不過佢都成日望妳啦，妳又唔會唔自在嘅，重叫埋佢嚟添。」
V：「咁又唔同喎，就算佢有望我，我知道佢大部份時間都係望住妳，所以就算有受害者都係妳先，而且妳一定會保護我嘅，嘻嘻。」
我：「喂，望下靚女啫，唔使講到我成個罪犯咁呀？」
Q：「煮你嘅嘢食啦！見到你揸住轆腸個樣就覺得夠晒變態。」死港女，當初係邊個同我講鍾意食貴價大轆腸。
V：「呀，我覺得呢，男仔嘅話好似肥豬咁都唔錯喎，份人比較隨和，腳踏實地，又識唱歌，得閒重會上天台淋下啲花花草草，感覺上係個實際嘅男仔嚟。」