真·後現代末世純手寫校愛網小《交叉仔傳記》: 2K205

Q：「係嘅，佢的確係一個好人嚟，起碼唔似得呢個咁句句都係廢話，開口埋口都講女，係畀唔到人fantasy啫。」咁…我都知韻婷係個好女仔嚟嘅。
我：「大佬…我成日講女，係多得妳哋喺我身邊咋喎。」
Q：「唓，無咗我，你咪又一堆EX…係呢，呢枝香檳飲唔飲得㗎？」邊有咁誇張喎，明明得嗰兩個咋嘛。
V：「唔得㗎，雖然屋企有教我飲酒，但我唔可以自己開嚟飲㗎，會俾人鬧死。」唉，遲早屋企迫妳識男仔添…
烚完意粉，就要處理其他食材，安全起見就整煲滾水烚埋幾條腸同啲甘筍仔，再將啲虎蝦仁汆水…之後用牛油煎和牛漢堡，反來反去…煎完就直接用鑊入面啲油炒香其他配菜，開始放喺碟上面，我搵到兩個又長又大嘅白色長方形碟，切開啲和牛漢堡同大轆腸，見到枝扭扭黑椒又係咁意扭幾嘢落去，最後就係用意粉醬炒港式茶餐廳意粉，有鑊底啲炒菜油就啱啱唔會燶，埋多少少燒汁同糖等個味道local啲，忍唔住手見到枝香草又摻咗幾下喺面。
攞個大湯匙加隻叉，轉幾圈就係啱啱好一球淑女食嘅份量，完美咁放喺佢哋隻碟嘅左手邊。好！上菜！
佢呢間屋真係乜都有，單單係叉都有三種size，全部係拋光不銹鋼嚟，重有好多酒杯啦，調味料啦…
最後我是但喺雪櫃攞咗枝橙汁，捧埋我碟意粉埋位。
V：「點解你嗰份唔同㗎？」
我：「邊有唔同，完全係同一樣嘢嚟。」雖然小弟係廢J，但都執到佢哋嗰兩碟有高級西餐嘅風味，切好晒嘅漢堡扒整整齊齊，大轆腸斜切一件疊住一件，再側邊就係排好嘅甘筍仔虎蝦仁，係衰在太拼圖式嘅感覺。




而我呢邊，係無多餘嘅切割，雜亂無章咁將啲食物倒晒落一個大沙津瓷碗入面，而啲粉嘅重量絕對係佢哋嗰碟嘅五倍以上，完美咁表現出銀咖喱富士山之道…如果你明嘅就明啦；最後連食具都唔同，意粉正中間插住兩枝我啱啱用嚟炒意粉嘅木筷子。
V：「係一樣吖嘛，咁我要你嗰碟！」又乜鬼呀…
我：「咪玩啦，呢度大兜咁多，妳邊食得晒。」
V：「唔得，係你整嘅，實留返碟最好嘅畀自己。」
我：「我唔係留碟最好嘅畀自己，而係最懶嘅畀自己…」
Q：「佢貪得意，你咪滿足下佢囉…」
我：「可以嘅，但佢嗰碟唔會食得飽我㗎喎。」
Q：「你慌佢食得晒咩，到佢食剩你咪有口水尾食囉，唔係開心死咩？」呢個女仔實在太瞭解我，可惡！
我：「妳講到咁變態…唔驚佢會怕咗我咩…」
V：「唔驚，因為我同你已經惜過，所以無事。」




我：「妳咁樣講，會攪到我更加唔好意思。」
V：「唔會吖，茜旎有男朋友都可以惜你，佢都無唔好意思啦，所以我惜你應該更加正常，都係學佢咋嘛。」