真·後現代末世純手寫校愛網小《交叉仔傳記》: 2K206

我：「妳千祈唔好學佢呀，佢先真係會教壞妳嗰個。」
Q：「好喇喎，關我乜事呀，其實最錯嘅都係易汪，係佢無端端搵你玩埋啲咁嘅嘢。」
我：「佢咁有問題妳都同佢做好姐妹，本身就有問題。」
V：「呀，唔好嘈喇，我信得過佢嘅眼光，所以喺佢身邊我一定安全嘅。」有時覺得我先係危險嗰個。
於是我哋就連埋餐具交換咗份食物。
V：「嘻嘻，而家咁樣你哋先襯返。」
Q：「啋，我做乜要同佢襯喎，我先唔會食意粉食到雪雪聲呀。」
我：「係鬼，妳喺屋企咪又係雪雪聲，呢度得嗰一球仔一啖吞晒落口妳想雪都雪唔到啦。」
V：「你哋明明就好襯，不如我幫你哋影返幅相。」唔知佢哋兩個點揀枱，總之一開始就坐咗喺圓枱嗰邊。
Q：「呀，唔得㗎，我唔可以同佢一齊影相㗎。」




V：「點解嘅？」幽蘭似乎從來唔會諗呢啲問題。
Q：「因為…如果俾其他人睇到，又會講埋啲唔知乜。」
V：「但明明…妳同社長咪又係咁影，重影過幾次添…」
Q：「咁唔同㗎嘛，我同會長光明正大，行得正企得正，又怕乜畀人講呢？」係…加埋全世界都知佢想追妳。
V：「啊，妳咁講，即係你兩個真係有路？」
Q：「唔係咁解，因為…我同佢嘅關係，比較尷尬。」
V：「有乜咁尷尬，咪又係同學嚟，有乜分別…呀！我知喇，妳係專登同社長影相做掩護，聲東擊西，等人哋唔得閒留意你兩個。」
Q：「欸…妳可以咁理解嘅，我唔反對。」
V：「啊！咁會唔會易汪都係煙幕嚟，妳叫佢同佢顯得親近啲，其他人就唔會覺得你哋有路。」
Q：「無路呀！我同佢一齊住㗎咋…易汪乜都唔知，更加唔會幫我囉，好唔好，分明係佢自己貪玩先撩交叉仔。」




V：「哦，即係話易汪佢好飢渴，就算有男朋友都重未夠，所以染指呢條友…嗯，不過佢應該有好多選擇先係㗎，使唔使搵到佢呀…」我知我好低質，都唔使咁講呀…雖然原理上我一開始就係易汪隻狗，要露體畀佢玩…
Q：「唔知佢呀，易汪呢啲…成日發花癲嘅，唔好理佢呀，我哋快啲食飯！」女仔一講八婆欬就可以連飯都唔記得食，計我話，我知唔晒妳哋咁多個想點，全部神神化化，係得個鍾意史露比嘅叫做似返個正常中學女生。
V：「嗯…雪…好味呀！」嘻，都話我對自己廚藝有信心。
Q：「佢煮嘢食…係OK嘅，所以喺佢屋企住唔會餓死。」頂妳啦，明明一開始就喺度嫌三嫌四。
V：「嗯嗯…重好味過我工人煮嗰啲…雪…妳可以成日食到佢煮嘅嘢食真係好幸福。」其實都係熟能生巧，迫出嚟…