真·後現代末世純手寫校愛網小《交叉仔傳記》: 2K207

Q：「妳個工人算好好喇，我以前屋企嗰個…都唔知佢哋點揀嘅，可以同我阿媽一樣咁地獄，好彩一早炒咗。」
V：「諗起就好笑，妳以前點佢去買嘢，然後就可以使走佢，完全唔跟時間嚟接妳，重可以買錯晒啲嘢。」
我：「我有個問題，妳屋企炒咗個工人，咁之後係邊個負責做家務？」點睇隻Q同Q媽都唔會想落手落腳。
Q：「笨蛋，呢個世界有樣嘢叫鐘點㗎嘛。」
V：「係呀，我屋企咁大，無可能一個人清理晒成間屋㗎，所以每個月有兩日管家會安排清潔團隊嚟清理，就喺我哋返工返學嘅時候…係呢，你重唔食意粉嘅？」
我：「等妳食剩還返畀我吖嘛，呢度一球仔，只夠我食一啖。」而QQ就好優雅咁兩三條意粉卷出嚟食。
V：「你真係可以一啖放晒落個口度㗎？」
我：「點會唔得，呢度嘅份量只係相等於一個飯團仔。」
V：「你示範嚟睇下？」
我：「呀…啊…喑。」叉起舊意粉波放落口…




V：「哈哈，真係食得晒，佢係大口仔嚟。」
Q：「妳唔好俾佢影響到啦，黐得佢多會智商下線㗎。」
V：「真係㗎，咁茜旎妳IQ跌咗幾多？」
Q：「無，我識得保護自己所以唔會跌IQ，而且我重要經常對抗佢，所以可能IQ不跌反升。」
V：「見到你兩個咁…喺屋企嗰陣一定玩得好開心。」
Q：「無嘅…純粹換咗個屋企，唔同咗屋企人咁…反而最好嘅地方係近學校，日日可以瞓多成粒鐘。」簡單嚟講，佢唔會因為搭車時間而做少咗有意義嘅事，係瞓少咗。
V：「得你兩個喺屋企嗰陣…會唔會想做嗰啲嘢㗎？」幽蘭份人實在係無乜社交邏輯，邊有女仔食飯講呢啲嘢…
Q：「乜…乜嘢叫做…想做嗰啲乜嘢？」
V：「即係兩個人走埋一齊，互相做啲開心又舒服嘅事情…Bio教過但叫我哋唔可以做嗰啲呢。」
Q：「黐線㗎咩，我有男朋友㗎。」雖然…佢都係啱啱…琴日先變返單身，但我相信佢唔會咁快對外公佈。




其實佢唔講重好，俾啲狗公知道咗佢嘅狀態只會添煩添亂，唔計個麻煩嘅社長，實有好多人燈蛾撲火。
V：「乜妳有咁乖嘅咩？」
Q：「我幾時有好曳過呀，起碼乖過個易汪啦，唔該。」
V：「咁又係，我見妳惜團長嗰陣好肉緊，但係惜叉仔嗰陣就好hea，睇嚟妳都係要夠靚仔先會曳。」
Q：「唔係囉，同團長…嗰晚因為係要交戲，所以咪特別肉緊囉，平時同男朋友惜惜都唔會下下係咁啦。」
V：「係呢，妳同妳男朋友關係好唔好㗎？」
Q：「有乜好唔好…咪普通男女朋友咁囉。」…。
V：「咁係咪諗住以後都一齊，一生一世㗎？」