真·後現代末世純手寫校愛網小《交叉仔傳記》: 2K217

我：「明明妳就話全部同一間大陸工廠做，成本幾十…」
Q：「你理得我吖，啱用同埋靚咪得！」
V：「不如啱妳用嗰啲妳攞走晒佢啦…」
Q：「咁又唔使，佢屋企無咁多位放垃圾。」
V：「攞定兩三個，得閒可以換下款吖嘛。」
Q：「妳成屋都係呢啲嘢，會唔會諗住得閒換下款？」
V：「無呀…如果唔係管家攞畀我，可能連套都懶得用…」
Q：「嘻，妳梗係諗住整花咗嘅話，換過部就算。」
V：「吓…唔會囉，花咗少少又唔影響使用嘅，換機好麻煩㗎…同埋我咁斯文點會整花部機喎。」呢啲唔通就係真有錢人嘅思維？唔會因為樣嘢嘅價值而滿足，一樣攞嚟粗用，正所謂揩到花晒嘅車先係真正嘅跑車。
我：「可惜無啱我部機嘅，幫唔到妳屋企減少垃圾…」




V：「係呢，如果妳想換新機嘅話就出聲啦，我睇下幫唔幫到妳。」唔好誤會，大小姐並唔係同我講。
Q：「妳講過好多次喇，我部電話用得好地地，所以無呢個需要，妳畀咗部laptop我已經幫咗我好多。」
V：「可能…妳會驚用部太舊型號嘅電話會唔好意思吖嘛，妳又唔係唔知易汪嗰啲…」
Q：「理得佢，我先唔想人哋覺得我係敗家女。」實情係因為條八婆已經知妳無晒消費力，所以先懶得串妳。
我：「我想問，細盒呢啲…係耳機套？」
Q：「Airpods頭兩代，而家無人用，真垃圾嚟。」
我：「真係可惜，明明印得咁靚，唔知有無其他牌子笠得入呢？」乜款都有，上至Sanrio，下至梵高畫作…
Q：「唔好諗啦，呢個世界本身就大部份嘢都係垃圾嚟，例如你嗰啲砌完又拆返放入盒嘅LEGO。」
我：「妳咁樣講開，我係咪要考慮下捐返出去…不過…我哋應該唔會用電話殼嚟交換聖誕禮物？」
Q：「梗係唔會啦，鬼知人哋用邊部電話，玩咩！」




V：「唔緊要啦，最少都有啲貢獻，令到一個電話殼可以重見天日，如果唔係擺多兩年就要揼。」
我：「其實咁多人用唉瘋，啲殼唔賣得啫，如果攞晒返學校派應該可以令好多人受惠？」
Q：「唔好添呀，人哋未必會多謝你，反而做多咗。」
V：「係呀，以前我都成日畀嘢人，唔覺得佢哋開心。」
嗯…社會很單純，複雜的是人。於是我又抬返個箱上去，攞第二箱嘢落嚟。
我：「嘩，單聲道藍牙，司機大佬必備。」其實好幾年前重成日見，前面有條嘢伸長少少收音嗰啲。
V：「嗯，牌子嘢嚟㗎，不過而家已經無人用。」
我：「應該放咗好幾年？入面粒電重叉唔叉得著？」