真·後現代末世純手寫校愛網小《交叉仔傳記》: 2K218

V：「唔知㗎，叉唔著都無辦法，放多陣都係掉。」
Q：「你可以選擇為佢哋祈禱默哀，垃圾嚟㗎喇，就算送畀你，你又會唔會用吖…呀！呢個好嘢嚟喎。」佢攞起一盒仔嘢，出面個透明膠盒壓到裂咗，入面係一部電腦仔公仔，大牛龜螢幕嗰種，好似扭蛋咁。
我：「有乜用㗎？模型嚟？」
V：「幾得意喎，不過好似得呢一嚿。」
Q：「無乜用，迷你藍牙喇叭嚟，個畫面可以出到公仔。」睇嚟喺有錢人眼中，大部份嘅物質都係垃圾嚟，除非真係好貴，例如嗰啲乜鬼愛馬仕碎布咁。
V：「好似幾好玩，喇叭都叫做有用吖。」
我：「係咪同妳廳嗰對座地喇叭比，有幾耐無用過？」
V：「乜喎，成日都有用㗎，一陣出去播音樂囉。」
Q：「咁我要呢嚿啦，陣間試下叉唔叉得著。」
V：「但係嗰盒裂咗喎，雖然未叫做散開。」




Q：「理得個盒啦，去文具鋪買個閃閃盒放入去就得。」
我：「無咗個包裝，人哋會唔會以為係淘寶貨嚟？」
Q：「嗱，有說明書㗎嘛，呢啲嘢信就信，唔信就算。」係囉，學易汪講，而家啲淘寶名牌貨連張單都做埋畀你…
我：「係嘅，不過咁樣收到都係怪怪地。」
Q：「唓，又唔知係我送嘅，好歹呢嚿嘢幾嚿水㗎，定係你寧願收到水杯相架？」
我：「如果我屋企無水杯，唔介意收到水杯做禮物。」
Q：「講嘢啦你，見親你都係成煲水攞起倒落個口度飲，用乜鬼水杯吖，飛機杯就啱你用。」
V：「乜嘢係飛機杯？」
Q：「飛機…杯，即係…商務客位以上，飛機餐嗰隻有航空公司logo嘅杯。」QQ嘅老吹技巧呢…
V：「妳講大話。」佢用水靈嘅眼睛望住QQ，㧻穿佢嘅謊言，雖然大小姐佢無乜常識，但唔係傻嘅。




我：「唔好討論乜嘢杯喇，我哋嚟下一箱！」
然後，我又爬上梯級抬咗一箱嘢落嚟。
我：「嘩，呢箱好重下！」差啲抽唔起出嚟。
Q：「你頂住呀，我哋托住，你唔好甩手呀下！」
我：「起碼廿公斤，抬上去嗰個人真係唔簡單！」
V：「你講我管家？佢應該可以單手抽得起你。」唔記得咗佢屋企個恐怖管家，明明就退休但周身肌肉。
唉，如果我可以勤力啲去做gym就好，重要多啲錢買肉食，難得QQ單身，如果我可以型仔啲嘅話…
我：「嘩，成箱都係紙嚟，唔怪知得咁重…」
Q：「Memo紙…前年嘅卡通月曆，咦，有賀卡喎！」
V：「係呀，好多紙品無人買，放兩年就全部換款要掉…」




我：「聖誕聯歡送聖誕卡…應該唔算係一種錯誤？」