真·後現代末世純手寫校愛網小《交叉仔傳記》: 2K219

Q：「不如問下你吖，寧願收到罐頭定聖誕卡？」
我：「如果女神送卡畀我就唔同呀，只不過我而家日日對住妳…咁厚嘅，似乎係音樂聖誕卡嚟。」
Q：「唔出奇，呢啲款起碼七八十蚊張，做禮物都唔失禮。」
V：「音樂嘅唔使諗喇，以前玩過，響兩三分鐘就無電，公司都係因為知道粒電唔擺得先會掉。」
我：「咁其實，挑起張咭換入面粒電都唔係唔得嘅。」
V：「無人會做啲咁傻豬嘅嘢，連舊款藍牙都一大堆…」
Q：「都有啲係普通卡嚟，妳唔順手攞嚟寫？」
V：「以前小學我會寫畀半班同學㗎，不過呢兩年無嚕，之前啲同學好似唔多鍾意收到，如果你哋想我寫…」
Q：「梗係唔係啦，我收嚟做乜，但有咁多喺度，不如…」
於是我幫手揀咗三四十張出嚟，有聖誕，有生日，有康復，有結婚，就連RIP…呢個放返入去啦。




物質太豐富，引致唔知呢啲嘢有乜用…到下一箱。
我：「嘩，連滑鼠都有！」一睇就知無人買嘅款。
V：「一早講咗乜都有…嗰邊有printer添…」
我：「滑鼠墊…而家邊有人用㗎，連keyboard都有？」
V：「你啱用咪攞去，放喺度唔知擠幾耐要揼。」
我：「海盜船機械軸嚟㗎喎，唔係平嘢。」
Q：「上面貼咗張memo紙，睇下寫咗乜？」
我：「缺鍵喎…等我開嚟睇下先…無咗粒F8…」
V：「可能做過display，俾人玩唔見或者偷咗一粒。」
Q：「呵呵，咁又賣唔出，直接變咗做垃圾。」




我：「F8幾可有用喎，最多到要用嗰陣掹粒F7過去囉。」
Q：「對你嚟講，少十粒八粒制都用到㗎啦，你而家喺我面前，就連粒F4都已經懶得再用。」
V：「你哋喺度講緊乜，點解佢要用粒F4嘅？」
我：「唔用呀，佢自己都大搖大擺唔用啦…不過呢，呢啲制去黃金配好平㗎咋，十蚊八蚊就有粒。」
V：「哦，你鍾意啦，咁你喺咪要唧？」
我：「嗯，呢層…都唔錯嘅，雖然我屋企嗰個都係祖國機械軸嚟，買咗我成三嚿水…」
Q：「都好喎，你個keyboard鬼死咁污糟，如果有多一個就可以畀我專用…」
我：「唔使喇，無位放多個full size…」
V：「係囉，而家好似無人用咁大個，而且重要插線。」
我：「咁唔同嘅，呢啲係打機專用嘅。」




V：「我又唔打機，所以都係垃圾嚟。」
於是乎我又捧多兩三箱落嚟，有文具，精品，小型電器，所有你諗到嘅垃圾商品都可以喺呢間房搵到。
Q：「點呀…搵到你需要嘅嘢未？」
我：「未諗到，對住成地都係嘢，不如妳幫我揀埋…」