真·後現代末世純手寫校愛網小《交叉仔傳記》: 2K220

Q：「睬你都傻，自己送的禮物自己揀。」
V：「係囉，望住咁多嘢，我都唔知好唔好喺度揀…」
我：「咁本身妳諗住送乜㗎，自己另外買？」
V：「應該就唔會嘞，可能會叫管家幫我準備，或者買張二百蚊嘅商場卡就最實際。」
我：「嗯…呢個水樽其實唔錯。」
Q：「哈，攪咗成粒鐘，結果係水杯變咗做水樽。」
我：「唔同喎，呢個係全金屬，而且花紋又靚，加埋…呢個係made in…」我反轉個樽䚎個底。
Q：「唔使睇喇，見到個十字徽都知係瑞士啦。」
V：「嗯，好似係而家唔興所以落咗架，咪一大箱喺度…」
我：「問埋先，呢嚿嘢…夠一百蚊㗎？」




Q：「邊有人知係你送吖，咁驚咪打孖一次過。」
V：「都好呀，其實如果可以我想搦晒返學校派。」
Q：「咪攪，做親呢啲嘢只會變成混亂，揀款都爭餐死。」QQ實在深明不患寡而患不均嘅道理。
V：「咁…我決定送呢份啦。」佢隨手攞起咗個盒。
Q：「啊，原來妳都幾是但，好似都係垃圾嚟。」
V：「我諗唔到有邊件唔係垃圾嚟，見順手咪攞起囉，價錢應該差唔多掛，收嗰個如果無用咪畀其他人囉。」
我：「其實呢度啲文具，滑鼠，藍芽喇叭…要用都係用到嘅，未至於係垃圾。」
V：「唉，當你本身有樣好好多嘅嘢嗰陣，啲普通嘢就變晒垃圾，你見唔到我廚房有成大部咖啡機喺度咩？」
我：「係嘅…所以都係送畀人啦…」
V：「茜旎，我未用過呢隻壺，可唔可以幫我check下？」




Q：「我都未用過，入面應該有說明書呀…嗯…個塑膠袋包裝都重喺度，有濾網，個蓋扭得實，玻璃無裂…」
結果我哋喺呢間密室花咗粒幾鐘，解決咗禮物問題。
然後我哋就開始做正經嘢，因為幽蘭本身約我哋過嚟嘅托詞就係溫書，我諗佢一定有同父母講低。
我：「辛苦完一大輪，要食返個甜品補充體力。」
Q：「講啦你，分明就係為食，一見到髦粉就食唔停。」
我：「咩嘢呀，我好歹抬咗六七箱嘢落嚟，然後又全部抬返晒上去，係workdone嚟㗎！」
Q：「係喇係喇，講真啲雪糕又實在係吸引過啲貨嘅。」
V：「哈哈，雖然唔使錢，但都幾嘥精力同埋時間，明明去商場是但買件嘢就得，又或者托管家幫手…」叫管家買，人工加油費肯定已經貴過晒件禮物。
慎重起見，QQ即刻幫嚿低能嘢充電，起初三十秒係乜嘢反應都無，我哋三個都好擔心，唔係驚嚿嘢入面粒電壞咗變垃圾，而係如果用唔到嘅話我哋又要入去揀過第二件嘢，早知應該試完先抬返啲箱上去。