真·後現代末世純手寫校愛網小《交叉仔傳記》: 2K221

V：「個mon著咗！叉電中。」有條低能綠色條。
Q：「咁…應該無壞啦，叉多一粒鐘先再試。」
V：「好，咁我哋係時候揀衫喇！」
Q：「點解妳會咁興奮㗎…明明係個易汪亂嚟應承人哋交易，然後自己就放人飛機，迫我搵妳頂上…」講真，YY呢啲操作係好犀利，玩下玩下唔經唔覺我就變咗佢條狗咁，好懷疑佢只要稍一失誤隨時同身邊啲人炒大鑊。
V：「欸…唔緊要啦，都係因為佢我哋先識到團長，同埋另外個哥哥，重有大Queenie，如果無佢哋點會贏得咁輕鬆。」好輕鬆咩？如果輕鬆應該唔使練直接上台攞奬。
Q：「係嘅，不過妳明明就唔鍾意團長。」
V：「一件事還一件事吖嘛…不過我想講，其實如果要聖誕裝嘅話我可以搵人做都得，唔一定要佢哋買。」
Q：「咪玩啦，妳又搵人做衫嘅話，無一萬都要幾千，我哋係去免費做model，所有支出梗係由佢哋負責。」
我：「妳哋唔係禮拜尾就要影喇咩？趕唔趕得切㗎…就算淘寶幾有效率都好，送落嚟係要三四日。」
Q：「所以呢，佢哋安全起見就唔上網買喇，有人識得深圳服裝批發啲門路，趁今日放假直接上去攞貨。」




我：「搵笨㗎喎，去批發度零售，實俾人劏都似。」
Q：「唔關我事，總之佢哋負責，最多買唔到衫嘅話我哋著便服影就算…嗱，佢哋連圖都send緊過嚟。」
V：「嗯嗯…但大陸啲衫得唔得㗎？」
Q：「咪又係咁著，著幾個鐘咋，妳屋企啲水都係東江水。」
V：「所以水喉水只會攞嚟沖涼，飲嘅係Bonaqua。」
Q：「無得挑剔咁多喇，大陸係世界工廠所以先有咁多款，佢哋隨便send嚟都幾十套。」
我：「係咩，有無聖誕內衣同聖誕比堅尼？」
Q：「人哋先無你咁變態呀，都講咗係學校活動嚟…」
V：「係呢，嗰晚阿爽你會唔會嚟㗎？」
我：「無諗住呀，我又唔係攝影學會，又唔係活躍份子，人都唔識多個，最重要係我連部似樣嘅相機都無。」




V：「吓，你唔喺度，我哋咪會好悶囉。」
我：「點會喎，有咁多同學喺度，妳可以睇到佢哋色瞇瞇嘅眼神。」
Q：「妳聽佢講吖，本身就因為成日對住我哋，所以先懶得嚟欣賞我哋嘅美色，唔值錢嚕。」
V：「嗯，佢喺屋企，應該可以成日睇到妳換衫？」
Q：「點…點會喎，可以入廁所換㗎嘛，點會益佢。」都唔知QQ佢點諗嘅，我當然唔介意佢乜都畀我睇晒，但同一時間又要喺姐妹面前扮清純，明明幽蘭都已經認為佢成日會去搵男朋友大戰…雖然真係唔等於要so我。