真·後現代末世純手寫校愛網小《交叉仔傳記》: 2K2H2D2

V：「但佢畀咗半間屋妳住，益下佢唔係好公平咩？」嘩！媽咪呀，點解呢個有錢女可以咁明白事理㗎？
Q：「咪…益咗囉！如果唔係我點會惜佢？！」
V：「哦，原來係咁…咁我同埋易汪都惜過你，所以你要分四份一間屋畀我哋。」
我：「點分喎…我間屋得二百幾呎，兩個人住算係啱啱好，如果我有間豪宅喺手就唔怕妳哋過晒嚟嘅。」
V：「好呀，如果我哋幾個可以一人一間房實好好玩，開心死，或者我同佢一間房都得。」
我：「妳諗太多喇，妳應該都係想非禮佢啫。」
Q：「你就真係諗太多喇，係無可能成班女女走嚟同你住㗎，你發夢啦！」係嘅，細蚊十二點都係要返屋企。
其實…我又無乜太多幻想，橫掂幾個女仔我都接觸過。
性幻想係有嘅，但呢個世界好現實，自知無能力吸引到佢哋，單單係QQ一個已經夠令我死去活來。
V：「我哋兩個係咪要著一模一樣嘅衫呀？」




Q：「無話唔得嘅，都係視乎我哋意願，但係一樣嘅話好似會有啲悶…呀，呢條連身裙好似幾啱妳。」
V：「吓，咁多布…條裙又長，實著到成個聖誕老人咁…」
Q：「咁咪啱妳囉，乖乖女係唔可以著得太性感㗎。」
V：「No呀，唔鍾意，人哋係鍾意…例如呢啲。」
Q：「咦，唔錯喎，呢件吊帶top應該幾啱我。」
V：「乜嘢幾啱妳，我都一樣啱㗎！」
Q：「係唔係呀，妳心口撐唔撐得起個shape先？」
V：「乜唔得呀，我都有波㗎！我唔係Zil…」
唉，怕咗佢哋，一班女仔喺度其實會好煩，有兩個都已經夠晒高攻擊力…我都係疊埋心水開始做…抄功課好過。呢個時候真正嘅乖女係應該一路溫緊書，一路撚緊狗。
女仔揀衫男仔不宜多嗲，所以我全程無理過佢哋，大約半個鐘多啲佢哋就有咗定案。




Q：「呀，係時候試下個傻仔喇叭。」妳都知夠晒傻。
開機，有藍牙icon，然後連電話，連完有隻哈哈笑喺度彈彈下，我唔敢叫呢嚿做垃圾，但最少對我嚟講係無用嘅，喇叭就喇叭，加個mon嚟托咩，明明電話成大個mon…
Q：「好！有聲，無壞，呵呵呵。」
我：「點解係蒸糕包嚟嘅？」
Q：「就嚟聖誕節吖嘛，我都係隨手揀一首。」
我：「咁有無耶穌搵我笨？」
V：「乜嘢叫做耶穌搵你笨？」
我：「耶穌爭我三千蚊唔還咪搵我笨囉。」
Q：「咪同一首歌嚟囉，低B，幽蘭妳唔好理佢啦，佢講嘅每一句嘢都係無營養㗎！」唓，有無營養呢啲係睇受眾嘅啫，而且就連QQ都知我講緊乜。