真·後現代末世純手寫校愛網小《交叉仔傳記》: 2K223

V：「呀，係喇，話過唔好嘥咗對喇叭，播下歌先。」
Q：「播歌無問題，唔要莫札特呀下唔該。」
V：「啊，妳又知道對喇叭成日播莫札特嘅？」
Q：「望都望到啦，妳音響櫃上面先放咗幾隻CD…」
V：「咁李斯特好唔好？又或者係舒伯特？」
Q：「如果得呢堆嘅話…我寧願聽Twins。」
V：「妳嘅意思係咪即係Twins好難聽？哈哈，唔使呀，而家啲HiFi有music server同串流，唔使再播CD，嗱，妳自己揀就得。」佢遞咗部iPad畀QQ。
Q：「嘩，咁先進嘅，有專用App添？啲data點過落去㗎？以前我屋企嗰套駁到藍牙我已經覺得好好彩。」
V：「唔知噃，又唔係我整嘅，以前啲CD收埋晒嚕。」
Q：「非常唔錯，重方便過卡拉OK，就咁啦。」




我：「妳唔悶嘅咩…喺屋企已經成日彈，嚟到又播。」
Q：「咁我彈一首咋嘛，呢度係成隻CD，啱溫書用。」
V：「我知，呢首係Frozen。」
我：「其實…以妳嚟講，應該無可能唔知道呀？」
V：「梗係唔係啦，好多我都無睇過㗎…係呢套先有得睇，但係就連第二集我都無得睇。」
我：「如果要睇…應該㩒幾粒制就可以租到？」係我先會覺得嗰幾十蚊好貴，死都要搵到高清片源嚟BT，但最大嘅問題係啲字幕檔，我鬼識聽英文，明嘅就明啦。
V：「嗯，但如果我顧住玩，俾人發現係會鬧。」
我：「睇下戲啫，都唔算玩呀…不過，對喇叭嘅聲音真係動聽，我完全分唔到係喇叭聲定係鋼琴聲。」
Q：「梗係啦，一對喇叭幾十萬，點會俾你咁易分到。」
我：「我都知係好靚，但真係要成幾十萬？成部車喇喎…」其實呢，小弟並唔係唔知道一分錢一分貨呢個道理嘅，為咗打機同睇迷片，我部腦個耳筒都買咗兩嚿幾水…




V：「你唔好聽佢亂講啦，其實我都唔知幾錢…」
Q：「妳部琴…無記錯嘅話好似四十幾萬？咁對喇叭應該都差唔多啦，重有擴音機嗰啲呢？」
V：「可能啦，但我唔係好重視啲嘢幾錢㗎咋，我嘅生活好簡單，可以同你哋一齊玩就已經好開心。」
計嚟無謂，同我嘅生活相比實在太遙不可及，溫書好過。
我哋喺大廳側邊嗰個文書開會廳度溫書，佢兩個坐一邊，我就坐另外一邊，時不時有隻腳伸過嚟撩我隻腳，其實我分唔到隻腳係屬於邊個嘅，佢哋又唔係望住我，所以繼續溫書就算數，而我亦都無避開。
我：「呼！做晒功課，都叫做溫咗下書…」
V：「係咩…我覺得你有一半時間喺度眈天望地。」
Q：「佢係咁㗎啦，重有四份一時間喺度望靚女。」
V：「望妳啫。」呢位女神真係禮讓，同YY差得遠。