真·後現代末世純手寫校愛網小《交叉仔傳記》: 2K224

Q：「男人好花心㗎，妳都一定有份…不過算好㗎喇，佢起碼真係自己做晒啲功課，如果佢喺屋企，肯定每做完一樣功課就要玩半個鐘貨櫃車。」
V：「都幾得意，我公司啲司機，次次要搵人加班就要求班大帝咁，佢無錢收都想不停揸貨櫃車，可能真係好適合嚟開工，如果你讀唔成書我請你啦，不過無優待㗎。」都唔係第一次話請我開工，可能佢真係好鍾意支配我。
Q：「佢再係求求祈祈咁，我驚佢連個車牌都考唔到。」
V：「唔緊要嘅，一次唔得咪考第二次囉，我哋公司有啲倉務，都係做住嚟考，pass咗個大牌咪可以揸車囉。」
Q：「人工應該差一半有多？個個做倉務都想考呀？」
V：「咁我又唔係好清楚，倉務都有好多位，貨倉經理唔低人工嘅…嗯，如果佢做貨櫃車司機唔知養唔養得起妳呢？」其實我…好驚呢班活喺現實世界嘅女神。
Q：「哎吔！做乜無端端講啲咁嘅嘢，我邊使佢養。」…。
V：「但係，妳而家住佢嘅食佢嘅，都算係養緊妳？」
Q：「係可以咁講…不過至少啲衫重係我自己買㗎！」
V：「其實我覺得多同少唔係問題，只要有人養就係一種幸福，起碼知道有人重視自己。」




Q：「乜喎，我都有益返佢啦，我哋係…等價交換！」
V：「唉，唔干涉你兩個嘅私事喇，總之過得開心就得啦，有困難記得隨時搵我呀，我屋企人都就返到嚟，費事要你哋難做，聽日返學見啦。」
就係咁，我哋帶住戰利品離開咗幽蘭屋企；當然佢次次都會問使唔使送我哋返去，而我哋就堅持自己搞掂。
我：「雖然佢屋企乜都有，但講真幾悶下。」
Q：「重好講，人哋日日都盡責溫好書，你呢？陪人哋一日最大嘅貢獻就係食咗佢六杯雪糕，貪心！」
我：「乜喎…佢成個冰格都係，總要搵人食嘅…我主要係為咗試味咋，如果我係咁鍾意食一早買家庭裝放屋企…」
Q：「算啦，我諗幽蘭佢都鍾意你咁嘅。」
我：「吓，我明明就好普通，正常小朋友見到髦粉都會係咁食㗎啦，我先唔會扮矜持。」
Q：「你呀，自律呀，唔好人哋黐埋嚟就抽人哋水，佢係乖乖女嚟你玩唔起㗎！」
我：「我…諗都無諗過喎，淨係見佢係咁抽妳水。」




Q：「鬼叫我對波真係咁好揸…雖然我無所謂，但佢有時真係怪怪地，可能…如果佢識返個男朋友嘅話會好啲…」
我：「人哋咪講咗，全天候俾屋企監視，識乜鬼男朋友，況且…乜妳有好男仔介紹畀佢識咩？」
Q：「唉，難題嚟，要搵個有家底，有品格，清純得嚟又未拍過拖嘅男仔真係好難。」
我：「妳條仔原本可能係嘅，咪畀妳食咗囉。」