真·後現代末世純手寫校愛網小《交叉仔傳記》: 2K225

Q：「關我乜事喎，同埋佢越嚟越鹹濕，唔得！都係唔好提佢，已經係過去式嚟…係呢，你咪話呢度行返屋企都得嘅，唔遠㗎可？」
我：「唔遠呀，最多咪行半個鐘…多啲，以妳速度，明明妳就跑得好快，不過呢…」
Q：「咁我哋慢慢行返去啦，當慳返十蚊都好。」
我：「妳梗係咁講㗎，啲書就畀晒我搦…」
Q：「真係麻煩，拖住你嘞，肯行未？呢區應該唔會有同學住呀？似乎安全過搭地鐵。」
我：「啱啱間屋咪住咗妳同學囉…呢區全部非富則貴，我諗我哋學校唔多嘅，好似聽過有人住又一村。」
Q：「乜住又一村…唔係就係你隔籬嗰個咩？」
我：「吓…我點會知人哋住喺邊喎…好熟咩…」
Q：「你無同人哋溝通嘅咩？咁你知唔知阿花住邊？」
我：「呢個都知嘅…」其實我唔係特別想知㗎咋，知嚟又無用嘅，而且又唔可以呃QQ。




Q：「啊，原來係咁…不過又一村舊樓嚟，唔係好貴㗎咋，勝在大單位同實用，呎價可能同天王星屋企差唔多。」
呢個QQ，我諗第日做地產妹都無話唔得，回佣可以肉償就唔犯法…黐線，我到底喺度諗緊乜，以QQ性格應該唔會做呢啲DSE畢業就可以入行嘅工，雖然賣到豪宅嘅話人工會好可觀…又原來K姐屋企都幾富貴下，唔怪之得份人都有啲底氣，阿花喺佢身邊就十足十一個妹仔咁。
公屋，居屋，私樓，豪宅…真係每一級之間都係鴻溝。
我：「咁男班長屋企…應該襯得起佢？」
Q：「呢層…我又真係唔知喎，佢從來都無講過自己住乜地方，剩係知九龍塘附近，我諗就唔會平得去邊。」
我：「咁妳又使唔使擔心佢會撞破我哋？」
Q：「唔使，呢個反而唔擔心，佢做到啲乜喎。」
我：「與其話做唔到啲乜，不如話佢唔敢對妳做啲乜。」
Q：「點都好啦，我成日以為呢區行唔到返去學校嗰邊，好似隔開咗兩區點都要兜路咁。」
我：「本身係㗎，但係有小路，我都係行得多先識。」




Q：「喂，你睇下，呢間係咪時鐘酒店嚟？」
我：「係掛，唔多識分，呢邊啲屋仔好似全部差唔多。」
Q：「咪扮嘢啦你，人哋咪大大隻字寫住酒店囉。」
我：「係嘅，妳唔使擔心，我哋未夠十八歲入唔到去。」
Q：「唔知道…健仔同欣姐係咪會嚟呢啲酒店呢？」
我：「妳可以問佢㗎，佢哋總要搵地方扑嘢…」
Q：「人哋邊似得你咁幸福喎…睇下，有對情侶出緊嚟。」
我：「咁如果係時鐘酒店嘅話，係得情侶去嘅啫。」
Q：「條仔嘅眼神都幾閃縮喎，好似做完壞事咁。」
我：「佢呢啲叫做有羞愧之心，係人都知道佢啱啱同身邊個女仔扑完嘢，邊似得妳同人交配完面不改容。」




Q：「夠喇下你…噢，佢哋講完兩句分開咗。」
我：「咁睇嚟…唔係情侶？唔通係援交妹嚟？」