真·後現代末世純手寫校愛網小《交叉仔傳記》: 2K237

鄧：「每人…一枝珍寶珠？」相信係準備好嘅廢答。
一如大家所料，全場靜晒，但老實講我唔介意食枝橙味。
不過都係唔好提珍寶珠，會令我諗起個變態契妹。
鄧：「又或者…萬樂珠？短版嘅。」佢都蠢唔晒…
「係咪連埋汽水一齊送先？」唉，真係搵嘢嚟講。
鄧：「咁就唔得嘞，連埋汽水太多…」乜係重點嚟咩？
「可唔可以有誠意啲…例如戒指糖？或者唇膏糖？」我都想呀，最鍾意睇女仔食埋啲咁嘅嘢。
鄧：「欸…乜嚟㗎，算啦，我都係買兩磅蜜蜂糖返嚟畀你哋食啦，唔知你哋有無食過嘞，好好味㗎…咁聖誕聯歡就交晒畀你哋安排喇，我落返去先。」Hea得佢，新年買攢盒咩，雖然我同意蜜蜂糖係好好味…重有可樂糖。
U：「喂，阿朱，嗰日啲伙食準備成點呀？」
豬：「準備？你哋無人話到事，我可以點準備…」




U：「玩咩！得返兩日咋，咪叫咗你問其他人囉。」
豬：「我上個禮拜就講過有好幾班決定嗌大家樂到會，可以跟大隊落單，係你哋又話貴，又話食到厭，我先放棄咋，而家落都未必趕得切，問其他人又全部無意見…」
Y：「咁係吖嘛，大家樂過兩條街隨時有得食啦。」
Q：「而且到會都係肉醬意粉同咖喱牛腩…」
豬：「唔止嘅，加錢有火雞…重有春卷咖喱角嗰啲。」
K：「嗰啲咪又係cheap cheap茶餐嘅料嚟…」
V：「係呀，以前我哋公司年年都幫襯大家樂㗎，但呢幾年越嚟越渣，所以已經轉咗第二間咯。」年紀輕輕就開口埋口屋企公司…唉，雖然天王星都係差唔多。
豬：「咁所以…我可以點？到時咪雜不連咁買囉，pizza，炸雞，壽司，甚至乎M記，乜都好啦。」
Y：「聖誕食呢啲嘢，好似有少少灰…」
豬：「咁不如…玩下小學生煮飯仔，後日一人搦一兜嘢食返嚟囉，我諗你哋都試過。」




Q：「咪攪，我屋企唔煮飯，亦都唔想見到十兜菠蘿腸仔！」要講料事如神，佢都算數一數二。
我：「菠蘿腸仔唔錯㗎，再唔係，幫妳煮多兜都得嘅…」
V：「好呀，好呀！交叉仔煮嘢食好好味㗎！」
易：「嘩，係犀利喎，連女神都讚不絕口，不如嗰日伙食就由阿爽包辦算啦。」
J：「現實啲啦…我都唔介意煮嘢食，但唔想聖誕節前個肚出事，嚟緊重有好多餐要食。」
V：「唔會㗎！我琴日先食完佢整嘅嘢，乜事都無！」幽蘭真係叻唔切，係都要增加我嘅仇恨值先安樂，再者，所有材料都係嚟自妳屋企又有乜可能食到肚痛。