真·後現代末世純手寫校愛網小《交叉仔傳記》: 2K238

J：「咁我又唔係話佢，日日煮開點都有啲信心嘅。」
慕：「不如咁啦，到時開個外賣App是但嗌咪得囉，咁就實乜都有得食，唔使限死係嗰幾樣。」
Q：「外送好呃錢㗎，我哋又唔係無人，不如你哋成班仔出去做外賣仔咪得囉。」
易：「嘩，乜咁唔公平㗎，點解唔可以抽籤決定呢？」
Y：「講嚟都嘥氣，抽到我哋咪又係搵返…佢哋去搦。」
豬：「唓，攪到咁麻煩，咪又係食返附近啲餐廳，咁不如堂食算啦…聖誕聯歡係批准學生呢一日喺班房食嘢咋嘛，無講過禁止我哋好似平時咁出返去食㗎喎。」
慕：「又有啲諗頭喎，好似真係未試過全班同學一齊喺同一間餐廳食嘢。」
豬：「OK吖，三十幾人啫，我諗大部份餐廳都坐得晒，包佢全間或者半間個零鐘啫，嗰日食豪少少我諗大把鋪頭肯做。」
U：「我唔反對，但回歸原點，嗰日食啲乜？」
豬：「咪…中西合壁嘅茶記囉，咁就實乜都有得食。」




Q：「我唔係唔鍾意茶記，但聖誕揀呢啲係咪灰咗啲？」
豬：「講真，我諗啲仔就食乜都無所謂嘅，多啲種類，豐富啲，唔好太貴就得，不如…都係妳哋話事啦。」
J：「又唔可以遠，精緻少少嘅係得間東南亞菜，重有間西日cafe，但論菜式又真係無茶記咁豐富。」
慕：「嘢食都係其次，我反而喺度諗，呢啲餐廳嘅擺位setting，結果啲同學又係坐到一堆堆咁。」
Q：「唓，你方喺課室食就唔會坐到一堆堆咩，從來都係咁㗎啦，如果你好想同我一齊食咪出聲囉。」
K：「咁…如果個環境空曠啲，方便大家交流都好嘅。」雖然唔知K姐同男班長攪成點，但QQ都係擺明玩嘢。
U：「真係麻煩…最衰附近無酒店，如果唔係上去lunch buffet應該係最好嘅選擇，出面啲公司都係咁。」呢幾個女神…OK…酒店lunch我都重食得起嘅。
雖然諗返轉頭可能重貴過大家樂到會，但真係任食。
Y：「我有個提議！不如就去呢條友公司搞。」佢指住我…
傳下傳下，其實一早就已經差唔多全校都知我喺呢間酒樓打工，不過由於好正常所以無人質疑過我。




全班同學望住我，無人出聲，唔係等我講嘢呀？
豬：「唔反對，人哋尾牙都係酒樓搞，聖誕聯歡實無問題啦。」聽落好合理，但我係絕對唔想。
慕：「嗯…有自己人又真係方便啲嘅，酒樓又多嘢食。」
V：「好嘢！又可以食到交叉仔整嘅嘢食。」
Y：「咪玩啦…佢又點會係煮嗰個喎，喺屋企頂多咪煮下公仔麵。」死八婆，我炒丁隨時出色過茶記啦。