我是一個學界的灰姑娘: 86. 搵男校同我地打友誼賽

星期六嘅下晝，大家都換好衫係到熱身。我地遇上剛補完課嘅小敏姐。同佢傾左幾句，佢因為要返去會所溫書，佢就快步離開
 
然後，我地對手出現左。大家見到佢地果時，都一齊發出不可相信嘅聲音，甚至問教練
 
「教練…真係佢地呀?」
 
「係呀」
 
就連我都唔可以相信，我地今日友誼賽對手，係英皇書院。我地要同一班男排打友誼賽
 




相信大家都知道，男排殺波嘅兇猛程度，比女排更加犀利
 
「係…係男排呀…」有好多隊友顯得有d不安，但係隊長就拍拍手
 
「驚咩呀?我地照打，唔好輸俾d男仔!」大家士氣立即高漲
 
佢地有幾個隊員行到我面前望住我，好細心咁打量我，搞到我有D唔好意思
 
「呀…請問幾位…」
 




「請問妳係咪余家琪，Natalie?」其中一個男仔問我
 
點解佢會知道呢?不過禮貌上我都要答佢
 
「呀…係呀，我就係Natalie…請問幾位…」我呢句未講完，佢地就轉身同其他隊友叫
 
「喂!!係佢啦!!!」佢地d隊員好快走哂黎我面前，搞到我唔知點。究竟咩事?不過我再諗一諗後問佢地
 
「你地…係咪F.4D架?」4D正正係Ethan讀果一班
 




「係呀!大家準備…阿嫂妳好!」佢地好有禮貌咁向我鞠躬問好
 
係我身後嘅隊友不停咁偷笑
 
其實我有時會驚，因為Ethan係Miss Lam個仔、校長個孫、Miss Cheung嘅侄仔，雖然係掛名，我好怕因為咁樣而俾其他同學杯葛排斥。但係好彩我平時好幫人，只要有同學要我幫手，我都會盡量幫手。另外媽咪同偉叔好受同學歡迎，所以大家對我地一家三口好滿意，基本上我都變埋學校工友。
 
但係咁樣係學校叫我法，真係搞到我好尷尬架!!!
 
「得…得啦…雖然全校都知我同Ethan拍緊拖…但係都唔洗咁大聲…」
 
佢地其中一個隊員同我講「Ethan哥同我地講，要盡全力打贏妳地」
 
「我地會盡力嘅…」
 
其實Ethan係唔係呢..係學校得罪人多?係我諗緊果時，我見到佢係學校到出現。我都知道點解班男排咁想打贏我地




 
因為佢手上拎住人人有功練同埋一張投注表
 
我走埋佢身邊到問佢「點呀!?賠率點呀!!」
 
「家…家琪?唔…今次呢…就兩邊都1賠1…所以我唔會蝕好多」
 
佢個樣好有信心
 
「佢地買返哂自己贏呀?」
 
「當然啦」
 
我一手搶走佢份投注表，走返去我地後備席到俾所有隊友睇
 




「姊妹!!!佢地成班男仔落注話實贏我地!!!」
 
我咁講，引起成班姊妹不滿
 
「邊個咁大膽做莊!?我而家要窒個排球入去佢屎眼，再由佢條腸上黎，係口到出返黎!!!」隊長有D嬲…佢平時唔會咁講野
 
我好尷尬咁同佢解釋「係…Miss Lam個仔….」
 
「即係妳男朋友呀?」
 
「係…係….唔好意思」
 
「Miss Lam個仔都冇面俾呀!!!」今次英皇排球隊有排受啦…