從零開始的留班溝女生活: 9

話咁快就到咗我最期待嘅放lunch時刻，究竟Amy親手整嘅飯盒食唔食得落肚，我抱住一個做實驗嘅精神行落去canteen。係喎，要問下條友仔點解朝頭早上堂係噉望過嚟，斷估佢唔係呷我同Tina醋。

Amy：「呀Ken快d行過嚟啦！搵咗位啦已經！」

原來佢已經到咗我即刻九秒九衝過去先。

我：「唔好意思頭先去廁所，所以遲咗少少。」

Amy：「唔好話我Amy姐唔教你，你知唔知作為一個男仔要一個女仔去搵位仲要等埋你係會扣印象分。你真係唔好有下次，唔係你真係溝唔到女。本小姐大人有大量見你唔識野唔同你計較，如果換係第二條女，你已經玩撚完。」



我：「得喇得喇得喇！快啲開飯啦好肚餓呀！」

Amy：「死肥仔，成個腦淨係掛住食。」

我：「掛住食飯好掛住食女係咪先。」

Amy瞬間畀我收咗皮，完全諗唔到點樣駁，之後就拎咗個飯盒俾我。

Amy佢真係唔話得唔單止人又靚女，仲要煮嘢鬼正好食，呢d咁好嘅女仔邊度揾，唔娶佢過門真係對唔住自己。



我：「你阿妹真係好幸福，有個咁靚女嘅家姐煮飯比佢食，仲要煮得咁鬼好食，好食到日日食都唔會厭。」

Amy：「唔使喺度場口乖，講到尾你都係想我煮飯畀你食嗻。其實又唔係話唔得，反正平時都冇人陪我食lunch，不過煮多個量又要買多啲食材添。」

我噉再諗，發現咁嘅免費食人哋我都唔好意思，之後就喺銀包度拎左張500蚊紙出嚟遞畀佢。

我：「呢到今個9月嘅飯錢得唔得。」

Amy：「500咁多啊，應該夠你食豉油撈飯。」



我心諗：500一個月真係好似少咗啲，同垃圾活x午餐差唔多價，但係人哋係屎，Amy煮啲嘢嘅水平同垃圾活x冇得做比較，等級差太遠。

之後我又喺銀包攞兩張紅衫魚比佢。

Amy：「咁就差唔多，放心有菜有肉，包你食得飽。」

咁就解決咗每日返學嘅lunch，日日返學都可以同靚女單獨食lunch都只係收700蚊。

食完lunch同Amy吹咗陣水就夠鐘上堂。死火，唔記得問佢點解喺度望住我添，放學問或者聽日先問都唔係乜重要野。

上堂真係冇乜特別，都係我聽唔明老師up乜9，Tina之後好耐心咁樣教返識我，之後我又睇下有冇機會可以借啲意抽下水。

我：「Tina啲嘢咁難點解你都識嘅，你仲勁就可以教返我添。」

Tina：「呢啲好簡單嗻嘛，一聽老師講就會明架啦，乜你咁蠢架。我都唔明點解會可以留班，啲嘢明明咁簡單。」



Amy：「Tina我喺度串人哋啦，知你全級頭三好鬼勁，但係你教人哋唔好串人哋啦，人哋一個留級生啱啱嚟過我哋班就俾你呢個學霸串會好sad。」

Tina：「好喇唔話佢蠢喇怕咗你啊。你做乜咁幫人哋呀?」

Amy瞬間面紅。

Amy：「我睇你唔過眼姐，唔好諗住話我鍾意呢條友仔，呢啲毒撚唔啱我。」

我：「兩位靚女唔好嘈啦，我想聽書。」兩條女你一句我一句真係嘈到爆炸，想佢哋收聲係事實，但係我想聽書係假。

Amy Tina：「你收皮啦！女人講野同你出聲咩！」

成個班房瞬間靜咗，所有人嘅視線都集中喺我哋三個度，我哋三個即刻尷尬到不得了，想即刻搵個窿捐入去。



我：「成班友仔而家唔使上堂呀！望咩呀望！未見過靚仔呀！」好彩忍得住好無口快快爆粗，如果唔係一陣就可以同老師飲茶，我真係驚頭先急得滯唔小心連老師都屌柒埋。

兩位靚女嘈完之後又繼續開始上堂，就係呢個時候，Tina無啦啦挨近咗我。