性交轉運打喪屍: （28）

沿住樓梯行落去，地下同墻身都見有一啲乾左嘅血跡。

再行落多一層，娟姐無啦啦突然捉住我個膊頭。

我擰轉面，睇見對方用力掩住個口，想大嗌但又唔敢嗌。

開頭我唔知咩事，淨係見佢個樣好驚青。

跟住佢指一指下面，我將視線移去佢腳下，先知原來佢踩到一隻斷開嘅手掌，難怪會露個咁嘅樣出嚟。



一大堆內臟標曬出嚟我都見過，斷掌對我嚟講簡直小兒科。

我毫不猶豫，一腳就幫佢踢走左。

暫時落左兩層樓梯，我地都無見有喪屍。

只要落到一樓，再落多兩堂樓梯，就會到達地下。

總之未落到地下都唔可以咁老定。



就嚟落到一樓，仲落緊樓梯嘅時候，我見到一樓有一個單位道門打開左。

好坦白講，見到道門咁樣打開左，嗰下我個心已經有種唔好嘅預感。

我左手舉起螺絲批，右手揸實士巴拿，繃緊神經，腳步放輕鬆，慢慢行落去。

結果落到嚟，剛剛經過嗰個單位嘅門口，霎時之間，真係跑左隻喪屍出嚟。

「啊！！！」娟姐嚇得驚恐尖叫。



隻喪屍撲埋嚟，雙手擒住我。

好在我都有啲心理準備，及時反應過嚟，扎住左個馬步先無俾佢撲跌，但手上嘅士巴拿同螺絲批就揸唔穩，甩手跌走左。

隻喪屍嘅身形同我差唔多，只不過力氣就大過我幾倍。

佢捉住我手臂，隨即毫不留情，一口咬落去我個膊頭度。

好好彩，佢咬嘅係我攝左番簡嘅嗰一邊膊頭，因此咬唔到我啲肉，反而搞到佢自己一口都係泡。

我把握機會，借力打力，直接跳起，用個膊頭撞開佢。

佢連忙退後兩步，我眼尾睄到頭先跌左嘅士巴拿喺腳邊，二話不說，拿拿聲踎低執返佢。

「娟姐，你走先，唔洗理我！」



我諗住一個人搞得掂面前嘅喪屍，於是就叫娟姐佢走先，點知對方原來早就急急腳跑左落樓。

「Raaauuugh！！！」

喪屍向住我咆哮一聲，並舉手衝埋嚟。

我彎腰快速閃開，隨即揸住士巴拿fing埋去，打中左佢條頸。

喪屍不痛不癢，轉身想捉我，好在我又避得開。

之後，我繼續一路閃避一路攻擊，而且係有意識咁向住對方個頭嚟打，只係好可惜打極都打唔中。

處於脫水狀態嘅我好快體力不支，動作變得緩慢。



眼見自己無乜勝算，睇嚟都係逃走比較好。

問題就在於隻死人喪屍塞住左樓梯口，我根本過唔到去。

呢個時候，腦海閃過籃球員嘅假動作。

雖然唔知有無用，不過試下都好，我左腳弓步踏前，假裝行向左邊。

一秒之後，喪屍真係仆過嚟左邊，而我即刻轉去右邊。

我本身諗住自己成功過左關，點知好衰唔衰，隻腳唔小心kick 到喪屍隻腳，導致成個人失平衡，碌左落樓梯。

條樓梯至少有二十級，我一路就碌到尾。

幸好個身墊左啲嘢，如果唔係肯定撞到瘀傷，同埋碌落到去嗰下，好彩係撼到放喺樓梯口裝滿水泥嘅麻包袋，不但止幫我卸左啲力，仲避免我撞個頭埋墻。



我之前有提過，有人未經同意放左啲水泥、磚頭同鐵鏟喺樓梯口度。

其實如果我只要跌歪少少，就會撞到磚頭，所以值得慶幸，我只係撼到啲麻包袋。

然而依家唔係放鬆嘅時候，因為喪屍行緊落嚟。

我睄到角落頭嗰把長鐵鏟，打算攞佢嚟做武器。

剛伸手埋去，都未掂到個鏟，突然聽到一啲撞擊聲。

我擰返轉面，見到喪屍撲…

講錯左，唔係撲，而係同我頭先一樣，一仆一碌咁碌落樓梯。



佢碌到落嚟，撞到啲磚，然後啲磚就「hi」跌左把鐵鏟。

嗰一把大概半個人咁高嘅鐵鏟，傾側倒下，鏟刃向下墜落，劃出一道順時針嘅弧線。

「劈！」

血花四噴！

鏟頭邊嘅鋒刃位準確無誤咁劈中喪屍個頭，就好似狗頭鍘一刀取人首級，乾淨利落。

同一時候，剛才我跌左嘅螺絲批都碌埋落嚟樓梯。

呢下我就大概了解發生咩事。

頭先隻喪屍想落嚟捉我，結果踩中梯級上嘅螺絲批，導致冼腳碌落樓梯。

碌落嚟之後就撞到啲磚頭，然後啲磚頭整跌埋角落頭把長鐵鏟，再之後，把鐵鏟就打側咁墜落嚟。

喪屍碌落樓梯後，趴喺度嘅位置啱啱好又食正個鏟，仲要係十分精準咁斬中個頭。

咁多位置唔中，偏偏中左頭，啱啱好食中都唔知係我好彩定係隻喪屍唔好彩。

不過點都好，既然成功脫險，我可以鬆一口氣，快快脆同娟姐重新會合。