性交轉運打喪屍: （147）

「哈哈哈哈哈—」Alpha狂笑不止。

佢嘅身體比剛才大左足足一個碼：「我feel到有一股強大嘅力量，源源不絕咁湧緊出嚟！哈哈哈哈哈！」

對方又煩又難聽嘅笑聲聽到人好炆，我握實拳頭，飛身攻擊。

Alpha卻以移形換影般嘅速度，喺一瞬間避過左。

「砰！」拳頭打唔中目標，只打穿走廊上嘅墻。



「呵！」

對方發出招牌式嘅冷笑，發藍嘅雙眼睥住我，全身上下散發濃烈嘅殺氣。

「小心！」Kappa大嗌一聲，位處走廊盡頭嘅裝甲人再一次開火。

我快速移動腳步，避開迎面射來嘅綠色激光。

下一個瞬間，Alpha以肉眼睇唔到嘅速度，不停出拳狂毆。



我舉起雙臂作擋隔，佢嘅拳速極快，力量極大，加埋個兇狠嘅表情，完全就係想將我置於死地。

好在我都唔弱，一路防守都招架得住。

跟住佢出盡全力使出一拳，強大嘅衝擊力令我連退幾步，雙臂燙滾劇痛，不由自控咁顫抖。

「仲頂唔頂住呀？接住落嚟我要出全力啦喎！」Alpha吹吹拳頭，又命令班手下，「喂！你地仲棟喺做咩？仲唔拿拿臨嚟幫手！」

收到指令後，嗰班裝甲人立即揸住武器，奮不顧身向我地呢邊跑過嚟。



Kappa喺地下執起一碌斷左嘅木棍，同我一齊喺狹窄嘅走廊上同對面班友纏鬥。

混戰嘅過程中，Alpha呢條卑鄙小人竟然故技重施，捏碎啲石屎，再灑啲粉末去我塊面度。

「仆你個街！你個卑鄙小人！」白色粉末入曬眼，我嘅視線變得矇查查。

「哈哈哈！兵不厭詐！」Alpha乘勝追擊，出腳掃低我。

Kappa見我有危險，第一時間搶走裝甲人嘅激光槍，再用槍射向Alpha。

「哈哈哈！真係大個女啦，有毛有翼，居然夠膽開槍射我。」Alpha好輕鬆避開。

「我唔會俾你傷害到佢一條頭髮！」Kappa話音一落，就俾兩個裝甲人包圍攻擊。

「Kappa！」



我起身想去幫對方解圍，點知Alpha衝埋嚟我面前，且用力一腳踢飛我。

我成個人打橫咁彈飛去走廊盡頭嗰幅墻度，衝力之大，連墻都撼碎埋。

Alpha行過嚟，用居高臨下嘅眼神，不屑咁對我講：「唔係呀嘛，乜咁渣架！咁快就收皮啦？」

之後佢又一腳踩落我條腰度，大大力咁踩，大力到好似想踩斷我條腰。

「啊！！！」條腰痛到好似要裂開咁，我頂唔順嗌左出嚟。

「哈哈哈哈哈！」Alpha不停咁大笑，踩住我嘅同時，伸手入我褲袋度摷，想摷返嗰一張用嚟啟動時光機嘅透明咭。

不過佢摷曬我褲袋啲嘢出嚟，都摷唔到張咭：「張咭呢？你收埋左喺邊？」



「我唔知…」

「仆街！快啲講呀！」Alpha狠狠咁再踩得大力啲，我feel到佢嘅鞋底就嚟踩到入我啲肉裡面。

「都話左我唔知…」我咬住牙關回答，「我一直都擺喺褲袋…」

講完呢句，我個腦突然諗起一啲嘢：「唔通…係阿得？」

阿得昏迷嗰陣，我嘗試過整醒佢，而對方曾經清醒過好短既時間，當時佢緊緊咁攬埋嚟，唔通就喺嗰個時候，佢偷偷地喺我褲袋拎走張咭？

「下？你話嗰張啟動咭，俾嗰條係咁求我借時光機嘅爛坦拎走左？」Alpha大吃一驚。

「有可能…」

Alpha馬上叫孭住楊過嘅裝甲人過嚟，命令對方即刻摷阿得出嚟。



過左一陣，嗰個裝甲人返嚟匯報，結果係：阿得唔見左。

「咩話？條爛坦唔見左！」Alpha狂爆粗口，「Shit！屌佢老母！肯定係條爛坦偷左張咭，然後趁我地唔注意偷走去城大！」

「咁…咁點算呀？我地之前仲set左聲音導航，只要條友一插咭，講出指令，咁部機就會自動穿越，假如俾佢用左部時光機，咁我地咪返唔到去？今次慘啦！」裝甲人慌慌張張。

「妖！我唔好講埋啲我知嘅嘢！」Alpha拎隻自己嗰隻智能手錶出嚟，望一望時間，「仲有四個鐘，快快脆搞掂Kappa同呢條粉腸，我地趕過去應該仲嚟得切阻止！」

「係！收到！」裝甲人聽從命令，轉身加入戰團對付Kappa，至於Alpha就專心對付我。

「最衰係你條垃圾！咁都可以俾人偷走張咭！」Alpha嬲到震，抬高腳想甩力dum落嚟。