那天，我遇上了命運之藍: 圖書館的我倆

佢地由病房出黎，
斯洛往湘庭方向行去。
由此舉動我幾肯定佢係斯洛，唔係斯朗。
 
我伸手拉住佢：「忍住，你咁樣佢會好危險，同埋……」
 
講到一半既時候巧遙衝出黎攬住斯洛既手。
 
巧遙：「斯洛，你攰唔攰？我送你番去休息？」
 




佢呢個行為好似克意打斷我既說話咁。
 
最後斯洛同佢呀媽一齊走，
留低左巧遙。
 
我拍拍巧遙：「啲呀媽係咁。」
 
巧遙：「嗯……」
 
佢個樣真係幾唔開心，




搞到我都唔知好唔好繼續同佢講斯朗既事。
 
我地各自離開之後，
柔柔：「你係咪同巧遙講左？」
 
我：「係。」
 
柔柔：「佢咩反應？」
 
我：「無咩反應…可能果陣咁岩斯朗衝左出黎影響左。」




 
即使係咁，
佢既第一反應都離奇地冷靜。
 
柔柔：「咁遲下有機會再講……」
 
我：「嗯嗯。」
 
柔柔：「小狼……」
 
柔柔突然發嬌嗲既聲音……
 
我：「肚餓？」
 
柔柔雙手捉住我手臂：「都係小狼最知我心。」




 
我：「咁食咩？」
 
柔柔：「去王林記食？」
 
我：「唔驚多人？」
 
柔柔：「食呢個我可以捱一陣。」
 
落到去，
我地各自叫左碗撈粗。
 
我：「湘庭有無搵你，或者你有無搵湘庭？」
 
柔柔：「無呀， 佢好似有個朋友同佢一齊走左。」




 
我：「吓？男朋友？」
 
柔柔：「我都唔清楚，我淨係知佢成個人變晒，已經唔再係我認識既湘庭。」
 
我：「始終果下傷得佢好深……」
 
唔知斯洛有無能力挽回番湘庭？
 
柔柔：「不過我驚湘庭知道左之後會怪責自己……」
 
我：「我都覺得佢會自責點解無認出佢唔係斯洛。」
 
柔柔：「好想幫佢地……」
 




我：「但唔知點樣入手好……即使斯洛可以出番黎，但唔知咩時候斯朗又會走出黎，其實雙重人格有無得醫？」
 
柔柔：「你讀書果陣有無讀過相關既野？」
 
我：「我睇書果陣有略略睇過有關既野，但只係片面，未讀到深入……」
 
柔柔：「咁即係我地可以自己查書？」
 
我：「都可以，搵日去圖書館睇睇？」
 
柔柔：「好呀！」
 
總覺得柔柔係到公器私用……
 
第二日我地係圖書館見面，




柔柔離遠已經向我揮手。
 
柔柔：「等左好耐？」
 
我：「係呀。」
 
開場對白丫啦。
 
柔柔：「咁早知慢慢黎～」
 
我彈佢額頭：「以後唔同你出街。」
 
柔柔搖我隻手：「wei ya，唔可以咁嫁，下次早到買定碗仔翅比你啦……」
 
我：「我要雞脾。」
 
柔柔：「咩脾都比你～」
 
我向下望住著裙既佢。
 
柔柔搭搭我膊頭：「幾十歲唔好咁多幻想。」
 
頂，我仲以為佢會好似以前咁怕怕醜又面紅咁……
 
還我以前既柔柔！
 
我地各自搵左幾本相關既書就坐低一齊睇。
 
期間我不禁望望柔柔。
 
雖然幾乎每日都見，
但好似好耐無認真望過佢，
不經不覺柔柔臉上少左當初果種貓貓小可愛既感覺，
反而多左幾分青澀，而且仲……靚女左…特別係佢睇緊書既佢，
充滿住一份知性美，
即使係咁，佢個樣依然係行可愛路線。
 
柔柔望望我，再側側頭用表情問我做咩？
 
我擰頭用口形話無野。
 
圖書館…...
其實當年既佢係咪已經開始中意我？
佢係咩時候開始中意我？
點解到呢一刻佢仍然中意我？
其實我有咩好？
以柔柔既質素係可以搵一個好好好好好既男朋友。
 
柔柔send wtsapp比我｛你係黎睇書定睇我？｝
 
我再望望佢……
 
佢側頭向我微笑。
 
心入面突然有種久違既心動。
 
佢再send多個wtsapp｛小狼～｝
 
我望完電話再往上望，
佢再向我側頭微笑。
 
好想搣佢塊面……
然後佢向我豬咀。
 
我個心好似大力咁跳左出黎……
佢個樣真係好可愛……
 
佢｛快啲睇書啦，陣間陪我食譚仔｝
 
你咁樣氹我法，
咩都同你做啦大佬。
 
我｛ok｝