我次次拍拖都拍唔長，因為我……: 女鬼篇
今日阿希好早起咗身，應該話佢係冇訓過教，成晚都好忐忑不安，睇嚟佢好擔心阿謙嘅病情，大叔訓到死豬咁，阿希用盡九牛二虎之力拍醒佢話「喂，你今日唔係要番公司執嘢咩，仲訓，起身喇」十足十日劇啲老婆叫老公起身咁款
阿叔睡眼惺忪咁望下鐘，之後大叫「仆街，呢獲實遲過個八婆番到公司，仲諗住早過佢番去執嘢，廢事見到佢」睇嚟大叔好怕佢個八婆上師
阿希叫醒咗大叔之後換咗衫，打算出門去醫院，我問「你唔食埋早餐先出」佢話「冇咩胃口，我打算睇完阿謙之後先食晏」話說醫院離屋企都唔係好遠，行過去都好快到，阿希首先去咗街市打算買束鮮花，我陪佢揀完花就去咗醫院，話說呢間醫院都裝修咗，外牆都重新油過漆嚟，同我n年前嚟嘅樣都唔同晒，內部都唔同晒，地磚都唔同晒
我跟住阿希入咗𨋢，阿希細細聲咁問「其實醫院係咪好多鬼」我話「還好喇，頭先我同你穿過排街症果到最多，其實果到坐下到嘅有三分一都唔係人嚟」阿希話「
唔係掛，見果到咁多阿公阿婆排隊睇醫生，仲以為佢哋係人嚟𠻹」隔咗陣有個不速之客入咗𨋢，有個七八十歲嘅阿伯穿過𨋢門入咗嚟搭順風𨋢，阿希見到果下嚇到呆咗，睇嚟阿希仲未適應，遇到突發嘅情況仲係好驚個阿伯問「後生仔，你見到我啊？」阿希即刻話「睇....睇唔到啊」
傻仔嚟嘅，你咁答係人都知你睇到啦，不過阿伯都冇惡意嘅，仲笑笑口話「嚇親你唔好意思，我下次會開門先入𨋢喇」到咗五樓深切治療部，阿希嚇到一枝箭沖咗出𨋢門，我見佢心情都仲未平伏，手都嚇到震埋，我話「你冷靜啲啦，人哋見到你會以為你痴線」阿希深呼吸咗一吓，試圖平伏吓自己不安嘅心情，之後佢好激動咁講「痴撚線㗎咩，見佢咁樣搭𨋢法嚇到心都離一離」