《愛在。貴族學園》: Ch 5 ~ 張韻喬同學，請你幫一幫忙吧（上） Part 1

Ch 5 ~ 張韻喬同學，請你幫一幫忙吧（上）Part 1（連載日期：2021/09/29）

（回復第三人稱視角）

時間話咁快就到咗下一個星期四，呢幾日佢地都冇特別事情發生，非常安然無恙咁度過。

而教數學嘅Mr Ho就喺堂上，派返星期二嘅quiz畀大家。

不過，雖然有韻喬同俊軒嘅幫助下，但班上都仲係有人唔合格，結果當然就係俾Mr Ho罰放學去402室留堂做數。
 




除此之外，大家都因為咁，而畀Mr Ho嘅老牛聲訓話。

内容都係離不開話要大家俾心機呀，多啲溫習呀，做多啲題目同埋past paper咁，反正係學生都會覺得老師長氣嘅説話，Mr Ho都有講。

至於喺位上面，韻喬同天殷都各自由Mr Ho手中，接過自己嘅quiz卷。天殷喺睇過自己得到76分之後，就非常開心咁講

「多謝你又幫我啦，喬喬！如果唔係有你嘅話，唔好講話有7字頭呀，我連點先可以喺個老嘢手上合到格都唔知呀啊！」天殷一再衷心感激韻喬每次都Carry佢。

「還好啦，而且唔該你唔好咁鬼大聲啦，一陣搞到我同你都畀人罰就唔好啦」韻喬好細聲咁回應





「仲有呀，如果我幫你幫到咁出面，你都仲係唔合格嘅話，唔該你以後就唔好再黎求我carry你啦，」

「反正幫唔幫你都係唔合格嘅話，直接棄療就算啦，唔好浪費我寶貴嘅時間」

「啊，唔好咁harsh對我啦好姐妹，我應承你我一定會努力追咖啦。」天殷聽到韻喬對自己下狠話，就成個人即刻驚哂，仲要驚到震，於是都即刻要捉住對方嘅手。

但係，當天殷睇到韻喬份quiz之後……

「但係，喬喬你做咩……又攞到滿分架？你到底係咩構造咖？簡直係神人都有嘅。女神，請你接受小妹一拜」





韻喬聽到同見到天殷咁誇張嘅反應之後，都顯得好難爲情，而且塊面即刻紅哂。

但一秒之後，變返好似平時一樣嘅韻喬就話「其實今次份quiz，根本就一啲都唔入流之餘，其實完全就係一份垃圾。」

天殷聽到一臉震驚「哇，天才喬你講嘢咁爆，咁型得唔得咖？居然可以話個老人家出嗰份嘢係垃圾？」

「如果個老人家真係要出唔垃圾嘅程度，唔通你想5A全班放學之後集體去402留堂咩？」
 
「唉，殷殷啊，如果你甚至大家都願意努力多少少嘅話，咪唔洗每次quiz嘅時候，都膽顫心驚咁怕要去402，而係喺JUPAS放榜之後，可以齊齊整整咁升U囉！」

韻喬語重心長嘅回應，都係想大家努力考好個DSE，然後齊齊上大學，簡直熱血兼大愛到一個點。
 
「算吧啦你張韻喬，又唔見得林俊軒今次可以攞到滿分，佢讀書同你一樣咁叻，都應該有資格同你比啦掛？」

天殷突然之間提起林俊軒，韻喬聽到之後，心裏面就覺得有啲奇怪。





因為自從上個禮拜整跌書事件之後，俊軒居然到依家都冇問到韻喬要自己嘅電話號碼，而且都少咗好多交流。

但俊軒其實都知道，韻喬今次喺quiz裏面攞到滿分。或者，因為佢自己攞唔到滿分，所以就唔敢搵韻喬吧。

「好啦，好啦。我最勁啦，得未呀！你真係好煩呀，我都唔明點解你突然之間要拎我同佢黎比啦」

但喺講嘅時候，韻喬竟然再一次面紅，呢一切，天殷自然都可以目睹哂。

「呵呵，你不嬲都係咖啦，勁到一個點，唯獨係寸人你就唔夠我叻啦哈哈！」「最好又係啦！」

天殷繼續同韻喬嘅對話，然後兩個女仔一齊笑一笑，皆因天殷又將韻喬寸到一棟都冇。
 
不過喺兩個女仔喺都笑嘅同時，喺班房嘅另一邊，俊軒部電話突然收到媽媽林太send嘅訊息





（待續 ~）

IG link https://instagram.com/bear_big_big_writer