《愛在。貴族學園》: Ch 10 ~ 韻喬復仇記 Part 4

Ch 10 ~ 韻喬復仇記 Part 4（連載日期：2021/12/30）

「如果太過揸流攤嘅話，咁就不如唔好練啦好冇？」「你！……」
 
俊軒明顯被韻喬嘅説話KO，因為的確Ms Chan有叫同學去好好感受劇中角色嘅感覺，所以俊軒都冇得再追究，然後就繼續練習，當然俊軒心裏面都非常唔憤氣啦，所以都想盡快完成個練習佢。

至於同組嘅禮謙同天殷，佢地兩個由事發嘅時候，直到俊軒同韻喬再開始練習之後都冇出過聲，應該話…佢地兩個都唔敢出聲，當然天殷係知道發生咩事所以唔出聲啦。

而且，佢地兩個都覺得，頭先都只係韻喬冇控制好出手嘅力度，所以先會打到俊軒咁痛。





至於其他嘅同學，佢地都好專心咁排練，所以都冇去理俊軒同韻喬。

之後，天殷就提出話同韻喬交換男伴，而佢地幾位都同意。

天殷於是喺埋位之前，就私底下好細聲問韻喬「（小喬，頭先你係咪要報復，所以特登打咁大力咖？）」「（小小啦，做咩咁問？）」

「（你呀，打還打，都唔好咁大力嘛！一陣間你打到小軒流血，你就真係唔使再留喺度啦）」「（我知道啦！）」韻喬點點頭回答之後，就去同禮謙一組練習。

不過喺佢地開始之前，禮謙走去同韻喬講「小喬呀，一陣間可唔可以輕手小小呀？」





「可以嘅」相對於同對住俊軒時嘅輕佻態度，韻喬今次對住禮謙就變得溫柔得多。

喺附近見到嘅俊軒，就即刻問天殷「殷殷呀，你自己睇下啦，張韻喬對我嘅態度，同對謙謙完全係兩回事，你話佢頭先係咪有心打咁大力？」

不過天殷好快就割席咁話「我唔知道呀，我今朝都唔知道小喬會趁呢堂玩報復咖」

「而且有咩事都好，都要你地兩個自己解決咗佢，我同謙謙最多……都係幫你手咋」「好多謝你先」

最後，喺韻喬同禮謙練到要打一巴嗰一幕嘅時候，韻喬都明顯輕手唔少，搞到俊軒就更加不滿。





但係，俊軒都當韻喬真係出咗無情力，先會打到自己咁痛。

不過，其實天殷都唔野小，佢都唔小心打到俊軒好痛，但天殷好快都有同俊軒道歉。

落咗呢個連堂之後，又到咗lunchtime嘅時候。喺返去5A班房擺低樽水同文具之後，韻喬就好細聲問天殷

「頭先，個花心flirt女王仲有冇點呀？」「你話小軒？」天殷喺諗咗一陣即刻就再補充道……

「佢呀，其實頭先都好似好嬲咁，不過後來都消咗氣啦」「殷殷你氹過佢黎？」韻喬再問天殷「都唔算氹嘅，咪話你都係唔小心，叫佢唔好嬲你囉」

「明白，多謝你呀殷殷！」不過其實韻喬覺得頭先嘅一巴都仲未夠，覺得自己要再教訓一下俊軒。

「唔使客氣啦，我地都咁多年姐妹！」天殷回應道「好啦小喬，我地行啦，如果唔係一陣間啲食物賣哂就麻煩啦！」

「喂！等埋我呀李天殷！」於是今次就到天殷拉住韻喬跑去飯堂。





喺飯堂今日嘅餐單上面，韻喬發現到有茄汁豬扒飯。於是頭先已經借機復仇一次嘅韻喬，再一次搵到一個機會去整蠱俊軒，作為報復對方嘅一個手段

“嘿嘿嘿！林俊軒你今次仲唔死？”韻喬心裏面默念道。

於是，韻喬就要咗個茄汁豬扒飯，喺放低飯之後，韻喬就同天殷講「殷殷，我去拎支茄醬先」

要咗份漢堡包嘅天殷，就一邊食薯條一邊講「好呀，唔該喬喬！」韻喬於是就行出去。

喺見到堆茄醬之後，韻喬好快就諗到一個idea

（待續 ~）

IG link https://instagram.com/bear_big_big_writer