《愛在。貴族學園》: Ch 10 ~ 韻喬復仇記 Part 5

Ch 10 ~ 韻喬復仇記 Part 5（連載日期：2022/01/01）

（三平台10萬點擊次加更，多謝大家喺2021年8-12月嘅支持，如果唔係都唔會喺除夕做到呢個咁重要嘅里程碑）

喺見到堆茄醬之後，韻喬好快就諗到一個idea

“呀，不如今次叫個花心佬幫我開茄醬，然後一個唔小心，就成支跌落個衰人件衫上面都好喎，睇你個衰人以後仲玩唔玩我，玩唔玩其他女仔！”。

於是，今次韻喬就拎住一樽茄醬，然後扭鬆個蓋，走到坐喺天殷對面嘅俊軒面前，道「林俊軒同學，我想問你可唔可以，幫我同李天殷同學打開支茄醬呀？」





同頭先一樣，俊軒唔為意到韻喬面上黑心嘅微笑，於是二話不説就話「可以呀！」

「唔該你」於是韻喬就遞上番茄醬，但喺遞上去俊軒手上嘅時候，韻喬好“唔小心咁”，將支茄醬反轉，再鬆手跌落俊軒嘅手上。

然後因為個蓋鬆咗嘅關係，裏面嘅茄醬順勢，全部流咗落去俊軒件純白色嘅校服上面。

「小軒、小喬！小心呀！」「Shit！」就算天殷反應再快都好，大家都阻止唔到呢件悲劇嘅發生。

韻喬於是就扮哂嘢咁，喺自己個裙袋同埋其他同學度，拎紙巾畀俊軒抹身。





「哎呀，唔小心將支茄醬倒咗落你度添！」韻喬當然繼續扮嘢對俊軒講「真係對唔住呀俊軒！要唔要拎水畀你抹下件校服呀？」

同時間俊軒都已經開始清理身上嘅茄醬，不過都好似無補於事。

面對住今日連番嘅情況，相信再好脾氣嘅人，都未必忍到一個上晝，就已經兩次畀同一個人整到。

俊軒於是一邊清理，一邊對韻喬大叫「張韻喬！!頭先我就可以當係無情力啦，但係今次我肯定你係特登整我咖啦！？」

畀俊軒閙緊嘅韻喬一句聲都冇出，然後仲用一臉無辜嘅眼神，望住天殷同禮謙，凝造一個俊軒蝦韻喬嘅場面。





當然，場面都突然之間變得非常尷尬，連坐喺附近食飯嘅同學，都開始望過黎呢邊，然後再食花生。

面對呢個尷尬情況，同埋要控制住俊軒嘅情緒，於是禮謙就話「唉呀軒少呀，你冷靜少少先啦，可能小喬真係唔小心咖遮。」

不過俊軒依然都係好嬲「而且呀，韻喬同學份人平時都咁nice，點都唔可能會咁衰專登玩你呀！？」

夾喺俊軒同韻喬之間嘅天殷，都加入為韻喬辯解，同時冷靜一下俊軒嘅情緒「係囉小軒，小喬份人都唔係啲小氣鬼黎嘅，你就唔好發咁大脾氣啦，你會嚇到小喬同其他同學咖！」

當然，天殷心裏面都覺得，今次都係韻喬要向俊軒報仇嘅玩意，但又唔想佢地兩個喺度繼續針鋒相對。

於是就提出分開佢地兩個「呃…禮謙同學啊，麻煩你就同小軒佢去一去洗手間，同佢整理一下件校服啦！」

「好嘅殷殷！」「唔該……」天殷講唔該嘅時候，塊面都係紅哂。

而依然好嬲、握實拳頭嘅俊軒，就跟住禮謙去洗手間整理一下校服，餐枱就剩返天殷同韻喬兩個繼續食飯。




 
天殷其實都知道韻喬咁做，係刻意向俊軒報仇，但覺得今次韻喬玩得太大，於是就平心靜氣咁同韻喬講

「喬喬呀，我其實都好知道你嘅初吻，就因為小軒嘅大話，就咁冇咗而好唔開心，所以想向小軒報復。」

韻喬聽到之後咩都冇講，只係繼續聽天殷講嘢「但係，就正如之前我喺電話度同你講過，呢度始終係學校黎，報仇還報仇，但如果去得太過分嘅話，呢件事就可能會穿煲咖啦……」

「而且，當年都係學校睇好你嘅將來，所以先要請你由真光過黎讀，而且你又有咁多獎，你都唔想喺Form 5先黎因為呢啲事，而畀人踢出校咖嘛！」

「殷殷呀！」韻喬已經開始想反駁，但係天殷就繼續講……

（待續 ~）

IG link https://instagram.com/bear_big_big_writer