Ch 10 ~ 韻喬復仇記 Part 6(連載日期:2022/01/03)

「而且呢小喬,你要記住一樣嘢,(喺當初嘅計劃裏面,我地都冇預計過林auntie會要求你地當住大家面前kiss咖。)」

「所以,其實軒軒都係畀auntie擺上枱,嚴格上黎講,佢都真係一個受害者黎。」

「而且依家你都已經玩得咁大啦,所以小喬呀,你就聽我話,唔好再搞佢啦,好嗎?」
 
韻喬突然流下兩行眼淚,然後回應天殷道「咁…咁,我真……真係唔憤氣呀嘛!」



「但係嗰晚臨走之前,你唔係話你冇嘢啦咩?」天殷開始質疑唔坦白嘅韻喬

「但係你自己諗下喎,咁重要嘅嘢無啦啦就走咗去,你叫我點吞得落啖氣喎?!」
 
「喬喬,我知道呀,但唔憤氣還唔憤氣,你都唔可以咁樣當衆羞辱同學咖,知道未呀?」

天殷繼續喺度開解韻喬,仲輕輕掃韻喬嘅背脊「好啦,你今日已經整過小軒兩次咖啦,夠啦小喬,真係唔好再整佢啦。」

「萬一你再整佢,搞到軒仔佢唔再理你嘅話,你就麻煩啦。乖啦小喬,我地快啲食完飯,我同你去花園度散下步,然後先同你返去班房休息下,好嗎?」
 


「嗯…..唔該天殷」韻喬點點頭回應「但係好對唔住呀,我又麻煩到你,真係唔好意思」

「傻妹,唔好咁講啦,你係我喺呢間學校裏面,好少數嘅真心朋友黎,我陪你都係應分嘅」

之後佢地好快就食完飯,天殷就帶住韻喬,去學校嘅花園欣賞下花草,等韻喬可以放鬆心情,同埋冷靜返,等佢對俊軒嘅敵意都冇咁大之後,先至返番上去5A班房休息。
 
至於另一邊廂,喺男洗手間裏面,畀韻喬用一支茄醬,就將自己淋到一身紅色嘅俊軒,不停咁用水,嘗試洗走校服上嘅茄醬。

但無論點樣洗都好,俊軒見校服都仲係有好大撻紅色喺上面……



「妖!都唔知嗰個張韻喬今日喺度做乜鬼!」俊軒非常不滿咁對禮謙抱怨道「頭先上堂嘅時候,都已經畀佢當殺父仇人咁啦,一巴勁大力咁車落我塊面度,痛到痴咗線…」

「依家無啦啦食食下飯,就畀用成支茄醬照頭倒落黎,唉呀都唔知洗唔洗得甩呀,今晚返到去又要畀人問候,真係,唉」
 
「你冷靜小小先啦小軒」禮謙非常平靜咁對俊軒講,同時都有幫手清潔俊軒身上嘅茄醬「不過,一直以黎我都叫咗你唔好講大話啦!」

「雖然我都睇得出,今日張韻喬佢係有心玩報復,你都應該要由心理準備咖!」

「係,我知道我今日返到黎,都預咗會畀佢閙,但唔係咁樣咖嘛!」俊軒依然非常不滿咁講「喂謙謙你都幫我睇下,到底我頭髮有冇茄醬喺度,唔該」

「冇呀,你真係好彩呀,咁大支番茄醬倒落黎,個頭居然可以冇事!」

「不過呢,我想同你講,你呢排都係低調少少好啲啦,由得呢件事可以慢慢淡落去啦,張韻喬同學應該都唔會嬲得你太耐,但都未至於會唔理你嘅」禮謙語重心長咁講。
 
「喂,嗰晚喺殷殷屋企散之前,我都已經話過喺學校唔再提咖啦!但結果今日呢?我前前後後已經畀佢整咗兩次啦!」



「都唔知一陣間下晝堂或者放學之後,都唔知仲要畀張韻喬點玩呀!」俊軒到依家都仲係有啲嬲。
 
「但係其實你都嬲都冇用咖喎」禮謙繼續好冷靜咁分析「雖然張韻喬同學今日係過分咗呀,但係初吻呢樣嘢對於女仔黎講,係真係好重要好重要咖,係應該留畀自己個初戀男朋友,而唔係用黎應付你媽媽場馬騮戲嘛!」

(待續 ~)

IG link https://instagram.com/bear_big_big_writer 
已有 0 人追稿