Ch 10 ~ 韻喬復仇記 Part 7(連載日期:2022/01/05)

「雖然張韻喬同學今日係過分咗呀,但係初吻呢樣嘢對於女仔黎講,係真係好重要好重要咖,係應該留畀自己個初戀男朋友,而唔係用黎應付你媽媽場馬騮戲嘛!」

「而且個重點係,因為韻喬同學明顯係俾林auntie過咗一棟呢,進而搞到自己個初吻冇咗,畀咗一個自己唔鍾意嘅人,所以佢先會咁嬲…」禮謙繼續同俊軒講

「我自己都係講嗰句啦,以後真係對人好啲啦,搞不好你真係會轉機呢?」

「不過呢,你一陣間上到班房之後,點都要冷靜咖啦,」





「我諗經過天殷同學勸下之後,韻喬同學都應該冷靜咗咖啦,你地就真係唔好針鋒相對啦,知道未呀?」

俊軒於是就輕輕點頭回應,不過因為件校服都仲係有茄醬所遺留嘅紅色喺度,所以結果俊軒都係要去校務處買過套校服,去洗手間換過衫之後先返去5A班房。

不過好在嘅係,全班都冇人提起午飯時間嘅事。

就係咁樣,當日俊軒同韻喬兩個都冇再交流過,皆因天殷同禮謙都將佢地兩個分開咗。

而且都各自看住韻喬同俊軒,避免兩人再喺上堂嘅時候,或者放學之後發生衝突。





放學之後,因為屋企冇人嘅關係,所以韻喬就跟咗天殷,去李家大宅做功課同食晚飯,而俊軒就自己一個返去自己屋企。

但係,喺經過天殷嘅再三勸説之下,韻喬都終於意識到,今日自己真係玩得太大,所以韻喬都接受天殷嘅建議,之後要同俊軒道歉。
 
至於俊軒,佢喺諗返起呢一連串事件之後,都覺得自己應該,可以為韻喬補償得更多,而且都要令到韻喬接納返自己。

所以俊軒都預備一番説話,之後等機會同韻喬講返。

而喺當日嘅夜晚,天殷同禮謙約咗一個時間講電話,目的就係要確保俊軒同韻喬兩個,之後可以正常咁相處……





「喂禮謙,你食咗飯未呀?」天殷首先問「食咗啦,你呢?」「我都食咗啦,因為小喬佢屋企今晚冇飯開,所以我叫咗佢上黎我屋企食飯,啱啱先送完佢返去北角」

「原來係咁,今日真係辛苦你啦天殷」禮謙嘅溫柔,令到天殷都不自覺咁緊張面紅起黎。

但係佢地兩個都冇唔記得呢個電話要講咩「係啦,軒仔佢……冇咩事喇嘛?因為我要睇住小喬,所以我今日都未有時間同佢傾」

「冇啦,畢竟整件事都係因為自己做多咗,而先至會搞到咁大。」

「不過,聽佢頭先嘅語氣,佢都應該會修心養性,唔敢再亂咁口花花flirt女咖啦」禮謙回應道「而且,佢頭先都同我講話,想做多少少嘢去補償韻喬同學之外,佢仲想做多啲,去令到韻喬同學對自己改觀」

「咦,小軒居然有咁大決心?做咩呀?唔通佢真係想小喬做佢真正嘅女朋友呀?」天殷非常八卦咁問禮謙

「呢層……小軒就冇講太多啦,咁韻喬同學呢?佢放學之後點呀?仲有冇話要整小軒呀?」
 
「小喬呢,其實喺lunchtime之後,佢都已經冷靜咗落黎咖啦,而且都話想同小軒道歉,畢竟今日玩得過分咗,由其係茄汁嗰單。」





「但係小喬唔知點解又好怕醜咁,唔知點樣面對小軒同埋點樣開口」

「所以呢,如果謙謙……你可以嘅話,你一陣都幫幫佢同小軒講聲啦」

「好,我會咖啦,唔該天殷同學」「今次唔該你啦,不過如果你唔得嘅話,就等我代你同小軒講啦」天殷再補充道。
 
「唔會啦,我一陣都會再同佢講,我地應該會打機嘅」禮謙道

「不過呢,呢件事真係搞到大家都好攰,真心希望可以告一段落,就算之後韻喬同學要繼續幫手扮俊軒女朋友都好,至少佢地兩個都唔好面阻阻先」
 
「嗯,你都講得冇錯嘅,講真就算唔係真係一齊都好,我都希望佢地兩個可以正常咁相處」天殷回應道

「好啦,時間都唔早啦,你都辛苦啦,早啲休息啦,聽日我地都要返學咖!你地兩個唔好打機打到咁夜啦」





「知道啦,你都辛苦啦殷殷。咁我地聽日喺學校見啦,bye bye」「bye bye!」

「呃,謙謙呀?」「係,仲有咩事呀殷殷?」聽到禮謙把聲咁耐,天殷突然之間唔係太想收線。但隔咗一陣之後

「都……都係冇嘢啦」

「哦!好啦,晚安」「Good night!」

(Ch 10 韻喬復仇記  ~ 完)

IG link https://instagram.com/bear_big_big_writer   

p.s. 最近呢度靜咗少少
已有 0 人追稿