《愛在。貴族學園》: 特別篇 3 ~ 停一停，諗一諗 Part 1

特別篇 3 ~ 停一停，諗一諗 Part 1（連載日期：2022/01/22）

（三平台12萬5千點擊次加更，多謝大家一路嘅支持同鼓勵）

（本篇同正文關係不大，但同部分篇章有少少關聯，出現人物沿用正文5A班嘅一衆同學，可以當作獨立篇章閲讀）

就喺中四last day嗰日，Form 4A班房裏面，班會主席洪雪盈突然之間話

「4A嘅大家，我知道大家都好想返屋企打機，或者同bff出去銅鑼灣行街，不過我地想喺暑假搞活動呀！」





聽到雪盈咁講，大家都開始議論紛紛「做咩無啦啦搞活動呀雪盈？」「下！？我地屋企book咗暑假去大阪shopping同USJ玩喎！」「我都要去老鼠樂園呀！」「雪盈到底你想玩咩呀？」

去到一個咁嘈嘅班房度，雪盈就梗係講唔到嘢，於是就好大聲咁話「等等，大家安靜少少先！你地咁嘈我點樣講落去呀！」

大家於是都即刻收聲，然後雪盈就繼續講埋佢「我同班會其他人傾過咖啦，我地想暑假其中一個weekend，去一個三日兩夜嘅camp，目的都係想team building，等我地班都可以團結少少」

「然後日期嘅話，一陣間我就會將幾個日子，放喺Signal個班group裏面，等大家揀定兩三個日子，最多人投票嘅weekend就會揀當日...」

「如果時間唔啱嘅話，我地就會揀排第二嘅做spare，唔知大家有冇問題呢？」





雪盈講完話去camp之後，大家都顯得有少少興奮，畢竟喺學校咁多年以黎，絕少會有班自己會搞camp。

所以班上絕大部分同學都話佢，包括4A嘅學霸、獎助學金得主張韻喬同學。

「喬喬！你會唔會同我地一齊參加呀？」好姐妹天殷喺離開班房之後，就同結伴同行嘅韻喬講。

韻喬於是諗一諗就話「我唔知呀，我都要返去問下我爸爸媽媽畀唔畀去先喎」

「咁你自己想唔想去先？」天殷之所以繼續問落去，係因為覺得韻喬嘅答案實在太過官腔，都meet唔到自己期望嘅答案。





但係喺度將書放入自己locker嘅韻喬，突然之間面色唔係咁好，搞到天殷都即刻有少少驚慌失措……

「喬喬你冇事呀嘛？做咩突然之間面色麻麻咁嘅？你唔舒服？」

「唔係啦，我都係怕會同你地格格不入咋嘛，始終你地個個都咁有錢」韻喬於是將自己其中一個擔憂同天殷分享

「唉呀，張韻喬你怕咩呀，全級嘅明日之星喎！大家個個都想同你做朋友啦！」

不過，天殷嘅説話，反而冇hit到韻喬心裏面最在意嘅事。

韻喬見天殷唔能夠幫自己解憂，於是就話「我係話，如果又見到嗰個花心flirt女王去嘅話，我就真係即刻冇癮添呀！」

天殷於是恍然大悟，再笑笑口咁講「原來你係講佢。不過，既然你成日話呢個中一帶住你嘅隔離位唔好嘅話，點解你又會無意中成日提住佢同在乎佢嘅行為呢？我知道啦，莫非喬喬你……」

「喂呀！你唔好玩我啦，我幾時……有在乎同成日提住個衰人呀？！」喺韻喬嘟住個嘴嘅時候，韻喬都不經意咁面紅。





天殷於是就喺都嘲笑韻喬「嗱嗱嗱你睇下你！又面紅啦！你其實心底裏對人有意思就認咗佢啦！」

「我…我先唔會鍾意啲咁嘅人啊！」韻喬再一次好緊張咁否認自己對心目中呢個花心flirt女王嘅感覺，於是就對一對表試圖解圍話「殷殷，我班巴士就到啦，我都係走先啦，之後再見面啦，拜拜！」

「拜……拜喬喬！」天殷然後就好無奈咁講「呢個張韻喬呀，成日都會咁唔坦白都有嘅，明明自己對軒仔有情意結，就不停咁去逃避同否認，真係冇佢乎呀！」喺放好書之後，天殷都登上李家嘅座駕返去李家大宅。

好好彩嘅係，最後張生同張太都容許韻喬，參加呢次難得嘅班會活動。

就喺出發前一個禮拜，雪盈就喺班group裏面話，今次嘅主題係“動物星球AGM”，同時都要求出席嘅同學，要帶一種動物嘅頭套，參加遊戲同營火晚會。

（待續 ~）

（因應要出特別篇關係，Ch 11嘅連載之後會再繼續，敬請留意；同時都希望大家會鍾意特別篇，同理解後面說帶出嘅信息）





IG link https://instagram.com/bear_big_big_writer