《愛在。貴族學園》: 特別篇 3 ~ 停一停，諗一諗 Part 2

特別篇 3 ~ 停一停，諗一諗 Part 2（連載日期：2022/01/25）

一衆升5A嘅同學雖然都唔知道，到底班會今次喺camp度想搞咩。不過最後大家都係跟雪盈嘅意思照做，而且都有預備唔同嘅頭套，準備出席今次嘅活動。

同韻喬一齊去集合嘅天殷，見到韻喬嘅頭套之後，就忍唔住問……

「喬喬呀，你做咩會帶個野豬頭套咖？個頭套咁醜怪，邊度會match咖？」

「下，殷殷你唔記得咗，Form 4嘅學期中嘅時候，我遇過咩事啦？」因為天氣熱而着背心秀出好身材嘅韻喬，一本正經咁反問天殷。





天殷知道韻喬其實有少少不滿自己，唔記住自己好姐妹嘅嘢，而有少少嬲，於是就話......

「點會唔記得呀，你遇到一隻卡住喺欄杆嘅野豬，然後仲救埋人地全家啊嘛，之後學校仲要咁公開表揚你喎！」

「算你啦，呢個就係我揀用野豬頭套嘅原因啦，雖然我都想用一個好少少嘅。之不過，如果夜晚可以嚇下人嘅話，都幾好玩呀，嘿嘿！」韻喬露出一個蠱惑嘅微笑

（關於呢一段所述嘅故事，可以返去睇下特別篇 1 ~ 韻喬與野豬一族奇遇記）

當日去到營地settle down之後，班會都先安排戶外嘅集體遊戲。





雖然入camp當日天朗氣清，不過因為大熱天時都冇太多自然風嘅關係，所以唔使兩個鐘，大家都已經玩到身水身汗。

於是大家都提議去冲個涼換套衫，然後先去飯堂食飯。

飯堂都係供應普通嘅家常小菜，對韻喬呢位普通人家出身嘅孩子，當然就唔係問題啦。至於在場其他少爺同大小姐呢？

雖然話就話係有錢人家出身，但其實有時候佢地食嘅嘢都係同普通人冇咩分別，最多都係價錢貴少少咁，所以都冇話咩習唔習慣。

喺飯後，「大家食飽之後，我地都係休息二十分鐘，之後我地喺出面個大操場等啦，今晚我地有camp fire，大家記得帶埋個頭套啦！」





頭先講嘢嘅，就係班會主席洪雪盈。於是佢都同其他同學一樣，返到去自己房裏面戴上一個獵豹嘅頭套。

班女同學於是就問「嘩！雪盈，做咩戴個豹頭套呀？你想食咗啲男仔呀？」

「喂喂喂！你地細聲啲唔得咖？」雪盈瞪大對眼咁講，好似真係一直獵豹咁想食咗佢地。

不過，雪盈嘅語氣就突然之間變得蠱惑「但係你地……唔畀係我想食咗你地咖？」

「嘩！好驚呀！」包括韻喬同天殷在内嘅女同學，都為咗配合眼前嘅獵豹，而配合雪盈。

韻喬喺戴上佢嘅野豬頭套之後，同天殷喺下晝嘅時候一樣，對於韻喬選擇野豬做自己個頭套表示非常奇怪。

至於天殷，佢今日就扮埋男仔，戴住一個哈姆太郎頭套，搞到韻喬都覺得天殷好似一個傻大姐咁。

之後大家都陸續去到操場上，雪盈同班會成員都已經喺度起個火，大家於是就喺度傾下計等開始。





但係依家嘅佢地，都係喺度恥笑一下各位同學嘅頭套，因為除咗普通動物嘅頭套之外，有同學竟然係帶卡通人物嘅頭套，搞到雪盈哭笑不得。

喺個火起咗之後，大家都開始跳起舞同唱歌。為咗配合動物嘅主題，雪盈佢地所揀嘅音樂，都係同森林或者同動物有關。

除咗唱歌同跳舞之外，班會都安排大家可以喺其他同學面前，講下自己對其他同學嘅睇法，同時都搞出唔少笑話。

但係世界上偏偏無獨有偶，喺學校附近嘅一間一直視本校為敵對學校嘅國際學校，都係同一個營地有學生搞camp。

而呢間學校嘅學生，都出哂名唔友善同埋麻煩。所以韻喬佢地一見到佢地都喺度之後，就即刻稍為提高警覺，但係營火晚會繼續進行......

（待續 ~）

IG link https://instagram.com/bear_big_big_writer