特別篇 3 ~ 停一停,諗一諗 Part 3(連載日期:2022/01/27)

不過一切都真係好巧合,原來呢班國際學校嘅學生,都想喺度搞營火晚會,於是其中一個ABC,就好唔友善咁話

「You guys班讀假國際學校嘅so call rich people,get out of our way!個場belongs to ours!」同時身邊都已經有幾個金毛外國人,企喺個ABC身邊,好似想壯聲勢咁。

作為活動嘅搞手,雪盈就梗係想親自出馬。不過,對方始終都係男仔,所以4A嘅男班長、班會主席,以及幾個比較大隻嘅男同學等人,就同埋雪盈出去,同呢班國際學校嘅學生對峙。

至於其他男同學,就幫手保護在場嘅女同學,免得佢地收到對方嘅惡意對待。



而雪盈佢地因為冇除低個動物頭套關係,所以個ABC就即刻恥笑佢地「Haha,你地look下those shit,just pieces of on9」

其他國際學校嘅學生,都即刻指住4A佢地喺度笑。

對於自己嘅idea成為恥笑對象,雪盈固然係勃然大怒,於是就話

「哈!連中文都講唔好就走黎學人挑機,真係想笑死本小姐我啦,X 頭!又中又英都唔知你講乜」

班假ABC當然識聽雪盈講乜,不過喺佢地心目中,講中文等於low已經深深植入佢地嘅思想之中。



「而且第一,我地覺得好玩就已經可以,唔需要你地話我知,到底呢個營火晚會係咪真係你地口中嘅on 9。」

「第二,其實事前我地都已經book咗,今晚我地包場玩營火會。如果你地叫我地走嘅話,有咩公平可言呀?」

「乜你地學校嘅老師,冇教過你地應該要尊重人地嘅規則呢?定係其實有教,不過你地就自己選擇性講一套做一套呢?」

雪盈繼續試圖透過言語,去寸返班ABC「如果你地真係咁想玩營火晚會嘅話,麻煩你地應該自己去申請,而唔係喺度搞寸我地個party」

「I dunno what you’re talking about but you poor Chinese wanna bullshiting us」另外一個外國人學生聽完雪盈嘅説話,顯得非常不滿,繼續用英文放狠話「You guys, get out, this is our place!Not yours」



「我地係唔會走!你要玩嘅話話,就麻煩自己去申請book場,而唔係喺度搞事呀聰明!」

一個企喺雪盈身邊嘅男同學講,同樣都係目露凶光。但經過一段時間你一言我一語,大家依然都係度對峙。

最後,國際學校班學生,有一個最後都係忍唔住,喺離開一陣之後,就帶住一個玻璃樽,衝返去營地個操場度,好大力咁掟入去,在場嘅同學就即刻向後散開,畢竟都唔知今次班金毛喺度玩咩。

喺玻璃樽因撞擊地下而爆裂嘅時候,裏面突然之間有大量嘅煙霧湧出,一下子能見度變得非常低。

同時大家都開始離開營火會嘅場地,跑到去安全嘅地方。至於呢班搞事嘅國際學校學生,就趁混亂逃離現場。

而雪盈都喺一班男仔嘅陪同之下,去到辦事處搵依然當值嘅職員協助,同時都講出事發經過。

職員之後當然都有報警,同時下達逐客令,要求呢班國際學校學生即時離開營地。

呢班學生當然就非常不滿,畢竟時間都已經唔早,而且要畀佢地心目中嘅poor Chinese趕走,就更加心有不甘。



喺搞掂哂之後,時間都已經去到夜晚十一點幾,雪盈於是就喺班group裏面,問大家到底今晚要唔要繼續營火晚會,要唔要繼續落去。

不過,大家都話因為個氣氛,都已經被班敵校學生破壞,所以繼續落去都已經冇意思。

反而大家都想養足精神,準備聽日嘅活動,所以雪盈最後都係決定取消,同時都有同大家講唔好意思,然後再喺自己所住嘅房間裏面,同幾個女同學一齊傾計,當中包括埋天殷、韻喬同文曦。

「雪盈呀,其實你已經搞得好好咖啦,雖然今日先係第一日,但係我地都已經玩得好開心咖啦!」天殷喺度安慰緊返到房之後,一直唔係太點出聲嘅雪盈。

同時間,天殷都用一個有少少無助嘅眼神,望向身邊嘅韻喬。

一直以黎,韻喬都因為優秀嘅成績,喺學校裏面都係個有分量嘅人物,雖然家境唔好,但係好多同學都會聽韻喬嘅説話「係呀,殷殷其實都講得冇錯咖,今日大家都玩得好投入、好開心咖啦。」

「而且雪盈,你都要記得喎,我地依家都先得15、6歲咖咋,可以冇任何老師幫忙之下,搞到一個summer camp出黎畀我地玩,都算唔容易咖啦!所以你就唔好因為有班人玩寸個party而自責啦」



韻喬嘅呢番説話,當然都引起在場其他同學嘅同意。過多一陣之後,雪盈先開聲話「多謝你地呀,不過最重要都係你地玩得開心。」

「好啦,大家不如今晚都早少少休息啦,聽日我地都仲有其他嘅活動等大家,仲有水game,記得着泳衣呀!大家晚安啦!」

「知道啦,晚安!」大家於是就熄燈休息,不過因為今日實在太攰嘅關係,所以大家好快都訓着。

而就喺訓着嘅時候,韻喬突然發現自己穿過一陣煙幕「咦?呢度邊度黎咖?」

但係喺夢境裏面嘅韻喬,好快都發現自己有少少唔係好對路

「點……點解我自己好似矮咗咁多嘅?!而且……我下巴唔會踮到草地咖喎?!究竟……究竟我做咩會用四隻腳行路咖!?」

「到底依家發生咩事呀?」但就喺韻喬依然好驚慌失措嘅時候,突然就聽到一把熟悉嘅聲音喺度叫自己

「喬喬!喬喬!你係咪喺度呀?!」「殷殷?!係咪你呀?你喺邊呀?」



「我依家喺你下面呀?」「咩……咩下面呀?你講得好核突呀李天殷!」天殷嘅聲音的確喺韻喬下面傳出。

不過韻喬今次諗錯隔離,以為天殷喺度講……韻喬於是就郁下自己個身,嘗試去搵天殷,但係天殷於是就好大聲話......

「喂喂喂!!喬喬你小心啲,唔好踩死我呀!」「咩呀?一係你去我前面啦!」韻喬依然都唔知發生咩事,喺自己想轉身嘅時候,就畀天殷嘅聲音叫停。

天殷於是就跑到韻喬前面。不過,韻喬眼前所見嘅,只係一隻倉鼠。

所以,韻喬就即刻問「倉鼠你係邊個呀?」「我係殷殷呀喬喬,你做咩真係會變咗做一隻野豬咖?」體積細小嘅倉鼠要同一直野豬講嘢,自然要用非常大嘅力氣啦。

但係,韻喬聽到天殷話自己變成一隻野豬嘅時候,反應就變得好大……

「咩話?!你話我變咗做一隻野豬?!」「係呀喬喬,而且你個樣同你個頭套係一樣咖!」天殷將自己所見嘅同韻喬講



「啊!點解我會變做一隻野豬咖?」「我都唔知點解我會變做一隻倉鼠」

天殷跟住講「喬喬,不如我地試下四圍行下,睇下呢度係咩地方黎?」「好呀!」

於是一隻野豬同一隻倉鼠,就一齊喺一個奇怪嘅地方度行。但行咗幾分鐘之後,佢地就發現「咪住先喬喬,你有冇發現呢度點解咁似……」

「我地今晚搞營火會個場地?」韻喬雖然變成一隻野豬,但係佢嘅聰明暫時並冇因為變成豬而有任何影響。

「係呀喬喬,但係唔知點解,依家呢度有少少恐怖呀!」反而天殷因為變成一直倉鼠,膽量反而就變到好細。

不過韻喬就話「應該冇嘢嘅,我地坐低喺度等下先啦」於是韻喬都要負起照顧倉鼠嘅責任。

但係過多一陣,韻喬同天殷陸續聽到有腳步聲,由營舍所在嘅方向傳出。天殷於是就收埋自己喺韻喬腳下,而韻喬都即刻望向後面,睇下到底係咩人黎講。

結果發現有隻獵豹,好快速咁衝向自己。

韻喬出於動物嘅本性,於是不斷後退。而天殷都順勢爬到韻喬嘅身上,始終小型動物有大型動物保護嘅話,點都會安全啲。

不過,當呢隻獵豹見到眼前嘅野豬之後,就開聲問「前面隻野豬,到底你係邊個?」

(待續 ~)

IG link https://instagram.com/bear_big_big_writer
已有 0 人追稿