《愛在。貴族學園》: Ch 12 ~ 好從實招來啦下 Part 6

Ch 12 ~ 好從實招來啦下 Part 6（連載日期：2022/02/26）

（三平台175K纍積點擊加更，多謝大家支持，我先不停有機會加文畀大家睇）

「不過軒仔呀，我想問下呢，喺你尋日送喬喬返屋企嗰陣時，喬喬佢個樣有冇咩異樣或者唔妥，可以搞到佢咁唔舒服要告病假呀？」今次到天殷有少少緊張咁追問。
 
俊軒於是就記起尋日放學到離開張家中間發生嘅事，面紅紅咁講「呀，小喬同我講話，腳眼受傷個位…都仲係有少少痛，但已經好過整親嘅時候好多…」

「不過令我覺得奇怪嘅係，小喬尋日喺返到屋企之後，佢就一直都話好熱好熱，返到屋企開大冷氣都算啦，佢仲走去拉低你地校裙後面條拉鏈，打出少少個背脊散熱」





「但係，尋日明明天文台唔係話得20度咋咩？既然都已經涼到咁，點解都仲要開咁大冷氣呢？」俊軒喺度R頭，好似諗唔明韻喬發生咩事咁。
 
「下！？尋日下晝已經咁涼啦喎，都仲要開冷氣咁誇張？！而且我記得韻喬同學佢尋日都冇帶到冷衫返學，一直喺班房裏面吹冷氣」禮謙再次好驚訝咁講。
 
「咁我估小喬佢應該喺吹冷氣嘅時候冷親，所以之後就開始發燒」天殷慢慢咁推斷道，但係喺見到兩個男仔非常擔心嘅樣之後，就反問「喂！你地兩個最近咁緊張小喬做咩呀？唔通你地兩個要 ……？」

俊軒同禮謙對於天殷呢個突如其來嘅問題，都一齊變得非常緊張，感覺到天殷已經將佢地兩個睇穿咗，佢地同一時間都鍾意韻喬嘅諗法

「喂，你地兩個好從實招來啦下！唔好以為我真係唔知道你地兩個男仔喺度諗咩呀！」
 




不過，俊軒首先喺度否認「唔係唔係，根本就冇啲咁…..」

「係呀殷殷，我估我地兩個都應該係….」禮謙打斷俊軒，承認兩人心中所想。

原先俊軒都想打斷禮謙，但係俊軒又唔想依家就將説話講得太絕，免得以後真係鍾意韻喬嘅時候招人口實，所以都冇出聲

「車！你地又知道我喺度講緊乜嘢咩？」天殷笑笑口咁喺度講「不過，既然都已經畀我估到嘅話，咁.….就不如等李家大小姐我幫下你地啦」

「但係殷殷呀，你一個又邊度有可能，可以同時幫到我地兩個呢？」俊軒一本正經咁質疑天殷頭先嘅説話「韻喬去到最後，都只可以揀其中一個一齊咋喎！」
 




「哈哈哈！你個小軒呀，咁唔誠實都有嘅！你唔記得咗上次講大話搞出大頭佛嘅教訓啦？」天殷喺呢段説話裏面，搵到位去寸俊軒，於是不停喺度恥笑對方「明明頭先先仲喺度唔認自己鍾意小喬，依家轉個頭又對人地咁鬼緊張。」

「你呀林俊軒，你係男仔黎咖，你係鍾意人地嘅話，咪大大方方咁認咗佢囉！都唔知你怕個毛咩！」

「至於我頭先嘅意思係，你地兩個要追喬喬嘅話，就梗係要你地自己諗辦法去追佢啦，小妹我可以做嘅，就只可以幫你地問問小喬，到底佢鍾意邊個多啲啦，你地兩個唔好搞錯或者誤會我呀！」天殷糾正道。

「哦，原來你嘅意思係咁。咁唔該哂殷殷你先啦！」俊軒同禮謙同聲道。
 
「不過呀！我同你地講明先呀，你地兩個是但邊個追到小喬都好，唔該你地都對佢好啲呀，知道未呀？你地一定一定要知道，小喬喺學校，甚至喺校外，都有唔少人追咖！」天殷非常認真咁“告誡”兩位男同學。
 
「遵命！李家大小姐！」兩個男生再答道。不過，因為始終自己係最後一個，接觸同照顧過韻喬嘅人，覺得韻喬病倒自己都有一定責任，所以俊軒就提議話

「既然今日小喬唔舒服absent，大家又咁擔心佢嘅情況。咁不如…我地喺放學之後，打電話畀小喬，問候下佢，順便了結我地依家心裏面嘅疑問，好冇呀？」
 
「都好呀軒少，始終韻喬同學依家得佢自己一個留喺屋企，父母又同時都唔喺香港喎，我都好怕佢呢個大頭蝦一定照顧唔掂自己」禮謙和應。




 
「既然係咁，咁不如我地放學之後，就喺班房裏面等啦」天殷同意道「不過呢，你地兩個就唔好太過擔心啦，一陣專心上咗堂先啦，始終依家啲老師教書教得咁快，我地又可能要教小喬功課」

（待續 ~）

IG link https://instagram.com/bear_big_big_writer