Ch 14 ~ 入院 Part 2(連載日期:2022/03/18)

喺韻喬入到治療室裏面之後「請問你叫咩名?」「張韻喬」「ok,麻煩坐低呀。依家麻煩打開口“啊”,同你檢查一下喉嚨先」急症室當值醫生道。

韻喬於是按照醫生吩咐去做,之後就拉高自己見衫,畀醫生聽下呼吸。
 
「唔該張同學,我想請問點解今日會嚟睇醫生?」醫生一邊將自己同韻喬檢查嘅得到嘅資料,一一輸入電腦嘅時候問。
 
韻喬於是就開始慢慢解答「尋日因為我冇睇到天氣報告,唔知到天氣會轉涼,於是就冇帶冷衫返學,然後又喺班房裏面吹冷氣,所以冷親發燒都唔知。」



「到放學返屋企之後,就覺得個身好熱,於是又開冷氣,同埋沖凍水涼。」

「之後我就開始好頭痛,食過頭痛藥之後就上床休息。然後到今朝,就因為個頭好暈,所以我就冇返學。」

「到中午之前走去睇醫生,醫生診斷之後就話我有氣管炎,然後叫我休息幾日。」

不過,喺韻喬講出理由嘅時候,喺出面嘅天殷就聽到好嬲,因為韻喬之所以要入醫院,其實相當部分都係因為韻喬唔識照顧自己所造成,並唔係因為有其他原因。當然之後天殷都有如實同俊軒、禮謙相告。
 
「咁…請問你有冇帶埋醫生開比你嘅藥過嚟?如果有帶嘅話,就拎出嚟比我睇睇。」



「同埋張同學如果你有已知藥物敏感嘅話,都麻煩通知我一聲,唔該」韻喬點點頭之後,就由背囊裏面拎咗啲藥同醫生紙出嚟。

「已知嘅藥物敏感,我就應該冇啦。係啦,醫生呀,其實我尋日喺學校學緊跳舞嗰陣,曾經扭傷過左腳眼,今次我可唔可以順便睇埋呀,唔該?」韻喬怕自己尋日嘅腳傷唔太好,於是都順便喺度睇埋。
 
「可以呀張同學。麻煩伸你受傷嘅腳出嚟,咁等我幫你做埋個簡單檢查」醫生指示韻喬做幾下動作,摸兩摸之後就話......

「張同學你應該只係拉傷咗啲肌肉啫,其他軟組織同骨都暫時冇事,不過以防萬一,再加上病人你有請求,我地都安排去照張x-光片睇下有冇事」醫生道。

「仲有最重要嘅係,你呢幾日盡量都唔好有太大動作,同搽藥膏就應該可以」



「知道啦,唔該你醫生」韻喬喺醫生繼續打字嘅時候,一邊回答對方。不過過多一陣,醫生就同後面嘅姑娘講……
 
「羅姑娘,patient懷疑有肺炎症狀,麻煩安排patient盡快去做肺部同埋左腳嘅x-ray,同時安排patient喺observation ward安排patient觀察。如果observe完之後patient都係唔舒服嘅話,就上Medical Ward唔該」

「知道啦陳醫生」姑娘於是就按醫生指示打電話通知觀察病房。

觀察病房嘅工作人員,好快就回覆話病房有位可以收症「咁安排patient去observe ward啦,麻煩準備好 admission docuementation,唔該」

「知道,陳醫生」韻喬知道自己要留院觀察之後,心裏面都有少少不安。
 
「張同學,呢幾日就好好休息啦,唔好再咁操勞啦如果有需要嘅話,你都應該預要住幾日先可以出院」陳醫生繼續一邊打字一邊同韻喬講

「但係張同學,請問你爸爸媽媽呢?點解佢地今日冇陪你嚟嘅?」「因為佢地去咗大陸出trip,要下個禮拜尾先返。」韻喬回答陳醫生道。

「原來。咁請問邊個同你入院?你嘅同學?」陳醫生再問韻喬「係…係呀醫生,幾個同學放咗學之後,上咗我屋企睇下我,之後覺得我情況好差,於是就決定帶我過嚟啦」韻喬好怕醜咁回應。



「哈哈!你地之間嘅感情真係好!依家啲後生都好少會咁咖啦,做得好」陳醫生笑笑口道......

「不過,呢幾日就可能辛苦佢地少少啦!好啦,我都要去睇下一個病人先,希望你早日康復」

「多謝醫生」

(待續 ~)

IG link https://instagram.com/bear_big_big_writer
已有 0 人追稿