《愛在。貴族學園》: Ch 15 ~ 告白 Part 6

Ch 15 ~ 告白 Part 6（連載日期：2022/04/15）

就喺韻喬繼續沉思嘅同時，當值嘅陳姑娘就敲敲門，然後見到韻喬愁眉苦臉，於是就好溫柔咁問候對方「你諗咩諗咩諗到入哂神，連我敲門都唔應門呀韻喬？」

「冇呀，呃……陳姑娘，我喺度諗緊啲功課啫，我好似有少少唔係好識做咁…」韻喬作咗一個似是而非嘅理由出嚟。

「哦，不過頭先唔係有個男同學嚟探你病咩？點解你唔問佢嘅？」陳姑娘又喺度繼續問，搞到韻喬都有少少尷尬，唯有硬住頭皮講個大話出嚟

「呃……因為我地唔同科嘛，所以咪教唔到我囉」





「原來係咁」陳姑娘繼續喺度set架餐，準備同韻喬做檢查。
 
「好啦，又夠鐘要幫你量血壓同探熱先。請問病人你叫咩名呀？」「張韻喬」

呢個對答，其實係屬於醫院嘅SOP，目的就係要喺進行醫療程序之前，核對病人身份，並防止醫療事故發生。講完之後，陳姑娘就幫韻喬做呢兩個check。
 
「韻喬放鬆少少先…嗯…你暫時仲有少少發燒，不過你做咩咁唔冷靜呀，你睇下血壓有少少高喎？你有冇邊度覺得唔舒服呀？」陳姑娘於是就指住血壓機上嘅數字畀韻喬睇，然後喺排版内記錄讀數，方便醫生同其他護士跟進病情。
 
「唔舒服就應該冇啦。不過，頭先我喺度煩緊份功課，所以先可能唔太冷靜，搞到啲血壓唔小心高咗少少添。不過你放心，我真係冇咩事呀陳姑娘」韻喬好直接咁回答陳姑娘。
 




「妳係至好呀韻喬。咦，你啲功課都好高分喎，睇嚟韻喬你喺學校裏面，成績都係幾好嘅一批學生嚟？」陳姑娘喺執返好啲工具嘅同時，睇到韻喬檯面上嘅功課，所以一時好奇咁問韻喬。
 
「嗯……都還好啦！」韻喬面紅紅好謙虛咁講「不過我覺得自己可以再做好啲，而且喺學校裏面，我地同學之間嘅競爭都幾大下！所以大家平時啲功課、小測，有時候都會喺度鬥高分」
 
「嗯嗯，雖然韻喬你身為一個高中生，有上進心係好事嚟。」

「不過你做還做，都唔好畀太大壓力自己啦，而且你依家仲要係病人，你係需要多啲時間休息咖」陳姑娘一邊整理韻喬新吊嘅一包鹽水一邊講。
 
「我會咖啦，多謝陳姑娘你關心！」韻喬報以微笑回應





「好啦韻喬，我返出去照顧其他病人先啦。如果你需要抹身嘅話，就自己撳鐘叫姑娘幫你啦！」

「知道啦，唔該陳姑娘」陳姑娘再三叮囑道，之後就離開韻喬所在房間。然後又一次得番韻喬一個喺度，繼續做佢嘅功課。
 
其實喺呢個時候，俊軒都已經到達醫院。佢喺一入到病房裏面「姑娘你好呀，我想請問張韻喬嘅情況如何？」俊軒對護士站嘅護士問道「我係佢嘅同班同學…」
 
「哦，你係佢同班同學呀？」另一個當值護士問「係呀姑娘！」護士於是報以微笑，然後就睇返陳姑娘啱啱放番出去護士站嘅排版。
 
「韻喬佢嘅情況其實都ok，但係因為都仲未退燒，而且肺炎都要少少時間醫，同埋個肺都仲有少少花，所以都預住韻喬要住多喺度幾日先」護士對俊軒道

「不過呢，我地同事都發現韻喬喺日頭都好似好悶下咁，所以都等你拎嘢畀佢打發下時間」
 
「哈哈！我知道啦，咁唔該你先姑娘！不過我今日都帶咗唔少嘢畀韻喬佢去打發時間，希望唔會嚇到佢啦」俊軒就指一指手上嘅環保袋，裏面全部都係韻喬嘅筆記同作業，數量之多都嚇到姑娘…

「同學，功課呢啲你帶還帶，但係都唔好帶太多呀，畢竟韻喬佢都係病人，需要多啲時間休息，唔可以用佢平時嘅workload照搬過嚟咖」





「嗯嗯！我知道啦姑娘」俊軒之後就慢慢行去韻喬所在嘅病房。不過俊軒又想同韻喬玩下，於是就……
 
「咯咯」...

（待續 ~）

IG link https://instagram.com/bear_big_big_writer