《愛在。貴族學園》: Ch 15 ~ 告白 Part 7

Ch 15 ~ 告白 Part 7（連載日期：2022/04/18）

「咯咯」突然有人敲韻喬病房嘅門。

喺病房裏面做緊功課嘅韻喬聽到之後，就好自然咁抬起頭望一望門口，但係就唔見到有人喺出面。

“唔知道係邊個嚟呢？“韻喬滿心期待咁喺度諗。
 
不過，俊軒都唔想韻喬為咗知道到底係邊個嚟探自己，而特登落床同推個鹽水架出門口，所以俊軒好快就現身...





「Surprise！張韻喬同學！」俊軒一邊打開門一邊同韻喬講。
 
「你好爛囉，林俊軒同學！」韻喬一臉嫌棄嘅同時，嘴角都不自覺咁向上揚「完全係冇嚟新意嘅！」不過韻喬心頭上都莫名湧出一股甜絲絲，塊面都開始有少少紅。

同一時間，俊軒都已經行到韻喬身邊，然後再將自己個書包放喺櫈上邊。
 
「咁冇嚟新意嘅話咁你又喺度笑？而且仲要笑到咁開心？真係假到死之餘，仲要死性不改咁喺度講大話！」俊軒又喺度寸韻喬，於是韻喬都作狀想打俊軒作為報復。

但係韻喬因為吊住包水嘅原因，所以韻喬都冇可能攻擊到俊軒。





「唔同你玩住先啦小喬，認真先。喺度一晚之後，你依家自己覺得情況有冇好過早兩日喺屋企嘅時候少少呀？」俊軒由頭先嘅嬉皮笑臉，一下變成非常認真同關心嘅模樣。

韻喬於是就話「頭先陳姑娘幫我探過熱，就係未退哂燒囉。其他嘅話都應該ok嘅，放心啦！」
 
「咁樣都好好呀。喂小喬，你鐘唔鍾意張卡呀？」俊軒指一指禮謙頭先帶嚟、放喺韻喬側邊嘅嗰張心意卡。

而韻喬喺禮謙走咗之後，就咁將張心意卡，放咗喺床頭嘅櫃桶上面。
 
「我好鍾意呀，真係好多謝你地就真，但係又要全班同學破費，我真係好唔好意思呢！」韻喬頭耷耷咁講，因為韻喬一直以嚟都好怕欠學校嘅人人情，而今次仲要一欠就欠哂全班同學。
 




「哎呀小喬呀，你客咩氣呀？大家係同班同學嚟咖嘛……」俊軒回應道「而且呢張心意卡呢，其實係Ms張提議話買嘅，然後由親自天殷揀咖，當然最後建龍負責埋單啦！」
 
「哈哈！原來係咁。唔怪得張卡會咁啱我心水啦！旨意建龍去買嘅話就真係……」韻喬終於知道真相之後，就不停咁喺度笑

「但我覺得，最重要嘅係收嗰個開心，同感受到全班對你有愛就好」俊軒微笑道，而韻喬塊面就已經紅哂。
 
「好啦，講到有愛呢，其實我都有嘅。嗱，之後就有今日嘅“禮物”，畀你慢慢打發時間用嘅！」俊軒今日比起平時，其實就多帶咗個環保袋，裏面裝嘅，全部都係韻喬嘅功課同筆記簿。
 
「嘩，依家做乜樹呀！？班老師喺度發咩癲….使唔使咁多呀？！啊……好想打人呀依家！」韻喬見到如斯多嘅功課同筆記表示頭痛。

「小軒呀，麻煩你可唔可以幫我叠起啲功課，然後將佢地放埋一邊，因為一陣間會有人送飯嚟，如果唔係枱面就會冇位咖啦，唔該你。」
 
「哈哈哈！原來我地天才都會有對功課頭痛嘅一日」「哼！你唔會？！」俊軒一邊幫手執檯一邊取笑韻喬，搞到韻喬都要即刻反擊。

「係啦，天殷頭先同我講話呢，佢屋企煲咗湯畀你補肺，叫你食飯唔好食太飽喎，留肚飲湯喎…..」俊軒都道出天殷要咁夜嚟嘅原因。




 
「嘩！殷殷屋企煲湯畀我呀！？」韻喬聽到之後成個人嚇咗一跳「我真係要多謝李太啦，對我實在太好。不過呢，醫院啲飯真係真係好難食，全部都淡茂茂咁！」韻喬都順便抱怨香港醫療系統嘅弊病。

「好心你啦，呀病人張韻喬，你病緊就咪鬼食得咁heavy啦，入醫院咪當清下腸胃囉，再清減一下你啲月巴就啱咖啦哈哈。」俊軒又喺度拎韻喬開玩笑。
 
「咩清減月巴呀林俊軒！你就真係食得heavy啦死肥佬！」韻喬又想對俊軒發動攻勢「上次呀，上你屋企食飯嗰日呀，餸菜都咁鬼豐富。小妹我一向清茶淡飯開！你就同我定啦，哼！」

「Ok you win！」俊軒對韻喬舉手投降，同時都決定轉下話題，畢竟今次俊軒真係畀韻喬cue爆，所以都無謂繼續講落去

「喂小喬，頭先聽禮謙講話你又話有功課唔識要問我嘅？你仲唔拎出嚟？」
 
「呀係喎，差少少就唔記得添學霸。你幫我去個櫃桶度，拎個LS同Maths功課出嚟呀，我有啲野唔係好明想問下你……」韻喬好似如夢初醒咁講「順便小軒你都將今日啲Notes，全部放哂入櫃桶度先啦，唔該你！」

「哦好呀！」俊軒於是好快就整理好枱面，方便韻喬一陣可以一邊食飯一邊做功課同溫習。





喺搞掂之後，呢兩個全級考第一同第二嘅優秀人才，就開始進行學霸級嘅討論。

但係佢地兩個都不自覺咁越坐越埋，埋到遠睇幾乎就好似一對情侶咁…

（待續 ~）

IG link https://instagram.com/bear_big_big_writer