《愛在。貴族學園》: Ch 15 ~ 告白 Part 17

Ch 15 ~ 告白 Part 17（連載日期：2022/05/11）

「林俊軒又口花花啦你，仲有呀！居然連我喺醫院醫緊病，隔住個電話，都仲要我扮你女朋友！你有冇搞錯呀死人頭死人頭死人頭！！」韻喬第一件事都係抗議，而且都非常順手咁，打咗俊軒嘅背脊一下「喂張韻喬！好停啦！痛呀！」
 
「哦，因為我地頭先坐軒仔屋企部車過嚟嘛…」天殷放好嘢之後道「所以小軒咪要同司機講大話囉！乜你好想依家前功盡廢咩張韻喬？！」
 
韻喬聽到天殷咁講就嘟哂嘴咁，因為自己都駁唔到天殷呢句「唉，林俊軒你個死人頭呢個大話，我真係付出得太多太多啦，今次居然連病人都要配合你嘅中二演出！仲要衰到冇霞姨派飯盒畀我食添呀！都唔知咩世界！」

「林俊軒你死啦你今次，你依家欠我嘅人情越嚟越多，之後有排你還呀！」韻喬笑笑口咁同俊軒講。
 




「咁你想我點還呀？」俊軒就用一個寸寸地嘅口吻問韻喬。

「我點知你想點還呀？不過我同你講呀，就算要還，個方法都要我同意先得喎！」韻喬好強勢咁講。

但俊軒就話「ok，但無論點都好，要還人情都係等你出院先算啦，不過搞不好，呢個人情可能一世都還唔哂呢！」

天殷聽到俊軒咁講，都即刻Woo~~一聲，而韻喬塊面都即刻紅哂「小喬，你啲功課點呀？跟唔跟到？」俊軒冇理到天殷嘅反應，而係先關心天才喬嘅功課進度。
 
「我呀…都Ok啦，而且你寫嘅notes我都好容易明白同埋跟得上。但係，就係呢份功課，有少少麻煩咁囉……」韻喬指一指檯面上嘅功課道「今次我就真係要等你教啦俊軒！」
 




「我都係呀！學霸呀，求下你今次你都順便教埋我啦！唔該你啦！」天殷其實都帶咗少量喺屋企搞唔掂嘅功課，而咁啱都係韻喬搞唔掂嗰part。
 
面對四隻誠懇嘅眼睛，俊軒都知道自己冇推卻嘅可能，於是就話「既然兩位靚女都開到聲，咁我都無謂拒絕你地啦，快啲拎功課出嚟啦天殷！」

「知道！」天殷於是就好快喺自己個袋裏面，拎出自己份功課。而俊軒都幫忙喺個櫃裏面，拎出屬於韻喬嘅功課出嚟。

「嗱，呢度就……」於是乎韻喬嘅病房，一下子就變咗大家嘅study class，互相交流學習嘅内容，而時間都因為三人討論得興起而過得好快，轉眼間外面都已經開始天黑。

而因為今日有天殷喺度嘅關係，所以之前俊軒同韻喬溫溫下書突然停低嘅尷尬情景都冇再出現。
 




去到差唔多六點嘅時候，大家就聽到有人敲門，然後「嘿嘿!大家好呀！」

「咦！禮謙你嚟咗啦？」禮謙都嚟到醫院探病，韻喬見到病房裏面咁人齊，自然都非常高興。

禮謙於是都點點頭「係呀韻喬，你見依家情況點呀？今日見到你好似好精神咁呢！」

「哦係呀，我都精神咗唔少啦，而且都差唔多退哂燒啦！多謝關心！」韻喬今日的確都冇咁辛苦，而且面色都紅潤返少少，但係外表上都仲係有少少攰咁「同埋梁醫生都話過我個肺冇之前咁花啦！」

禮謙聽到之後都有少少高興「好事呀韻喬同學，希望你可以快啲好番啦！」

「承你貴言呀謙謙！」韻喬非常開朗咁講。

不過俊軒呢個時候，就加把口話「哈哈！唔使你講，大家都知道你好咗好多啦！」

「點解你會咁講呀小軒？」韻喬紅住面咁，非常好奇咁問。但係「因為你打人嘅力度都開始返嚟囉，所以咪知道你好好多！」





俊軒嘅輕佻態度，自然引得韻喬非常不滿「林俊軒！你依家咩意思呀？！乜我好暴力好惡咩？！下！」然後又好大力咁打咗俊軒背脊幾下。

「喂！張韻喬你試下唔好咁暴力得唔得呀？」俊軒哀求韻喬道。

「去死啦你！你個死人頭成日都喺度話我暴力！！明明就係你蝦我在先嘅！如果唔係嘅話，我點會無端端打你呀！？你估我打你隻手唔痛咖？！」韻喬依然唔放過俊軒，結果都係要天殷出手相勸……

（待續 ~）

IG link https://instagram.com/bear_big_big_writer