《愛在。貴族學園》: Ch 32 ~ 陸運會之一 Part 3

Ch 32 ~ 陸運會之一 Part 3 （連載日期：2025/10/05）

不過，喺韻喬細心一諗之下「下，頭先媽媽只係遲我幾分鐘返到嚟，會唔會……唔係掛…」

冇錯，韻喬就係諗到，頭先落車嘅時候，可能就係畀張太見到，自己喺林家嘅座駕落車。

「死啦，雖然我真係同小軒拍拖啫，但如果我成日坐小軒屋企嘅車出入嘅話，會唔會好似今次咁，好容易就畀媽媽發現呢？」韻喬喺開水喉之後，再一次陷入沉思。

於是最後都決定話「可能第日佢要送我返屋企嘅話，真係要過兩個街口落車啦！」





然而，韻喬都唔敢再諗太多，都決定一陣喺電話度，等自己同俊軒商量之後先再決定點做。

而頭先見到韻喬呢個表情嘅張太，就喺度陰陰嘴笑。不過，張太之後都冇再追問，因為張太都覺得，到最後真相都一定會透出嚟。

但精明嘅張太，都會有百密一疏嘅時候，因為張太掛住煮飯嘅關係，所以張太並冇發現到韻喬左手中指上，已經戴咗隻戒指喺度。
 
至於喺另一邊廂...

俊軒送完韻喬返去之後，好快都返到林家大宅。一踏入大廳，林太就即刻起身話「小軒，你返嚟啦？」





「係呀，媽，不過你今日都咁早嘅？」俊軒一臉驚奇道，因為俊軒見到林太已經換上居家服。
 
「嗯，因為你爸爸今日要開會，而且都開得比較夜，公司要處理嘅事情都已經交由佢身邊嘅人跟進，所以你爸爸咪叫我，今日早少少返嚟屋企，睇下你同屋企囉」林太道「不過，你都係返上房，沖涼換衫先啦，我一陣間有嘢想同你傾。」
 
「好呀，咁我返上房先啦，失陪啦媽媽！」之後俊軒就返上自己房間，第一件事就係同韻喬報到。

韻喬好快就回覆話ok，而且仲話自己好掛住俊軒。俊軒見到之後，當然就喺度笑啦。

不過，同韻喬頭先喺自己間房嘅時候一樣，佢自己都偷偷地諗起，過多十幾日就要同嘉惠訂婚嘅事。





皆因喺埋到自己張書枱嘅時候，枱面上放咗另外一對、屬於自己同嘉惠嘅戒指喺度。

但係，呢一對個款式，就真係冇俊軒同韻喬嘅一對咁好睇。
 
好快，俊軒就入去洗手間冲涼。喺沖好涼之後，俊軒就好快落返去大廳，搵要同自己傾嘢林太「媽媽，我冲好涼啦，你有咩事想同我傾嘅？」
 
「冇呀小軒，就係想傾一下你喺學校同平時啲嘢囉。」林太一邊微笑，一邊表明來意「係呢，聽譚管家講…你最近都好勤力咁為陸運會訓練！點呀，你地嘅訓練進度如何啊？」
 
「我地進度都幾好呀，我估應該可以喺陸運會度攞到牌嘅！媽媽，你都一定會支持我咖可？」俊軒好開心咁講，同時都希望令林太可以肯定自己嘅努力。
 
「哈哈！你係我地個乖仔，我同爸爸點都一定會支持你咖！而且，我地見到你咁上心去做呢樣嘢，我都當然值得支持同高興！」林太道「而且，平時功課以及小測嘅成績，我見到你都應該keep到名次吧？不過，我都知道你一直冇辦法贏過你女朋友張小姐。」
 
就好似平時一樣，只要俊軒一聽到有人提起韻喬，佢就會即刻面紅，今次當然都唔例外...

「呃媽媽，小喬佢其實平時都好勤力讀書，而且人又聰明，外貌又好，如果輸畀佢嘅話……我都心甘命抵嘅！但你放心啦媽媽，我同小喬都會一齊努力溫書，準備之後嘅DSE咖！」




 
「媽媽見到你兩個可以互相扶持，努力向上，其實真係非常好，而且你兩個睇落都係好登對。不過，有另一樣嘢，我都想你同我上心一啲。」

林太講到呢度，突然間嚴肅起嚟「聰明嘅你，我諗你都應該明白媽媽嘅意思吧？」

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer