《愛在。貴族學園》: Ch 32 ~ 陸運會之一 Part 4

Ch 32 ~ 陸運會之一 Part 4（連載日期：2025/10/18）

「聰明嘅你，我諗你都應該明白媽媽嘅意思吧？」
 
「媽媽，呢個我當然明白，而且我都知道你同爸爸，都明白我嘅意思……」俊軒試圖解釋，但同時都好膽顫心驚咁同林太表達自己嘅諗法...

「我都好多謝你覺得我同小喬好登對。不過問題就係，我都係想要黃家明白，而且最重要嘅，就係小嘉同學都要明白呢個道理。」
 
「哈哈，小軒你真係聰明。冇錯，頭先就係黃夫人親自打電話畀我，話你今日喺課室裏面同張小姐，喺大家面前做咗啲令到黃小姐好唔開心嘅嘢，係咪？」林太直接了當咁問俊軒。
 




俊軒聽到林太講咩之後，就稍為握緊拳頭，認為嘉惠今日喺班房，見到自己同韻喬求婚之後，就再一次同黃太投訴，於是就好冷淡咁同林太講...

「媽媽啊，其實我之所以要咁做，一來我係想用行動話畀大家知，我係真心鍾意小喬。」

「二來，我咁做都係想嘉惠同學明白，有啲嘢唔可以強求，唔係話自己想要點，就要其他人點點點，由其係感情呢樣嘢……」
 
「而且，喺尋晚我地去揀戒指嘅時侯，你都應該知道，我係想買畀小喬咖！」俊軒繼續講「我同嘉惠嘅一對，其實都係普通貨色，成個設計都係一般，唔係咩？」
 
「小軒，呢樣……媽媽我都明白嘅！」林太好表面咁安撫俊軒嘅情緒一下...





「不過，今日黃小姐就係受唔住，你喺學校對張小姐說所做嘅動作而產生嘅刺激，所以放學之後返去之後，就同黃夫人投訴。而黃夫人頭先就打電話嚟，就係同我講返呢件事去表達不滿。」
 
「黃夫人覺得，我地林家呢頭應承同佢地個女訂婚，另一頭你呢個未來未婚夫，就走去同另一戶人家個女求婚，好似我地有失信用咁…」林太繼續講...

「雖然媽媽我真係知道，小軒你係百分百咁鍾意張小姐，但係你今日咁樣做，其實係有機會會影響到屋企同埋公司，長遠而言對你地嚟講，都唔一定有好處。」
 
「所以，媽媽我都希望，喺你正式同黃小姐攤牌之前，如果你要喺學校同張小姐拍拖嘅話，我想你地兩個可以考慮低調少少。不然黃小姐再同黃夫人投訴的話，今次我就勉強可以保得住你同天榮集團，但下一次嘅話，就未必可以咁容易解決。」

「小軒，你都開始大個咖啦，你自己都要諗下，應該點解決問題，先至可以令到各方，都可以得到一個平衡，咁樣事情先仲可能有轉彎嘅餘地，知道未？」





林太拍一拍俊軒膊頭就走「另外小軒，今晚我地未咁快食飯住，你返上去做一陣功課先啦，到食得飯嘅時候，我再叫譚管家叫你落嚟！」
 
「知道媽媽啦，咁一陣食飯嘅時候再見！」講完之後俊軒就離開客廳，返到自己房間度。

雖然俊軒心裏面好唔服氣，但係既然林太都已經同自己講得咁直白，所以俊軒都唯有暫時聽從林太嘅意思。

而喺上返房之後，俊軒嘅電話，就收到來自其中一位花癡--陳旻靜同學嘅signal訊息…
 
「5A陳旻靜：林俊軒同學，我想衷心祝福你，可以同小喬同學，永遠都幸福快樂         19:26」
「5A陳旻靜：我想講今日，其實我唔係有心喺大家面前，咁高調咁衝出班房，但嗰時我真係控制唔到我自己，所以，好對唔住。     19:27」
「5A陳旻靜：我希望你同小喬同學，都唔好誤會我             19:27」
「5A陳旻靜：而且你以後都要好好咁照顧小喬同學呀！         19:28」
 
但俊軒其實都唔太記得，當時跑出班房嘅女同學就係旻靜，但點都好，出於男仔嘅風度，所以俊軒都好有禮貌咁回覆…
 




「5A林俊軒：冇事啊旻靜同學，但係我都多謝你嘅祝福！           19:43」
「5A林俊軒：但係你都放心啦，我會好好咁同小喬走落去！同好好咁照顧小喬咖啦           19:43」
「5A林俊軒：仲有，過兩日就到陸運會啦，你練習都要加油呀！            19:43」

喺回覆哂旻靜嘅Signal之後，俊軒都喺書房裏面，做咗一陣功課，然後先再落去大廳食飯。

而喺飯後，俊軒喺做好哂當日功課同溫習過後，先至開始同韻喬講電話。

當然，佢地兩口子嘅話題，除咗功課同陸運會嘅事之外，重點當然都係同韻喬講情話啦。

而且仲講到韻喬攰得滯而訓着之後，俊軒先至肯收線。

（待續 ~）

IG link https://instagram.com/bear_big_big_writer 




Threads https://www.threads.net/@bear_big_big_writer