《愛在。貴族學園》: Ch 32 ~ 陸運會之一 Part 5

Ch 32 ~ 陸運會之一 Part 5（連載日期：2025/12/05）

喺之後嘅兩日，學校同屋企都冇太多咩特別事情發生，而俊軒同韻喬佢地幾個，都過住平常嘅校園生活。

當然，大家都想喺陸運會度有好嘅成績，佢地幾個都持續備戰，但到咗星期三放學之後嘅練習，為咗唔好令自己受傷而不能夠上場，佢地幾個都只係做啲比較輕鬆嘅練習。

而喺呢兩日嘅練習過後，俊軒都會送韻喬返屋企，不過韻喬都刻意叫俊軒，唔好再將座駕停正喺自己屋企樓下，免得再好似星期一咁，差少少就畀張太當場“斷正”嘅事再次發生。

至於被林太開聲要求喺學校同韻喬相處嘅時候要低調嘅俊軒，佢同韻喬的確都冇再好似星期一咁，隨便喺學校向大家派狗糧。





雖然好多時候喺學校裏面，俊軒同韻喬都會同場出現，但係都唔會喺大家面前，再有過於親密嘅舉動。

韻喬呢個愛低調嘅女孩，自然都喜歡喺學校低調，但係學校外高調嘅戀愛感覺。
 
終於就去到星期四，係學校本年度陸運會初賽嘅日子。各位同學都對呢一日嘅來臨充滿期待，包括應承咗韻喬，要喺比賽裏面攞牌嘅俊軒同禮謙...

「哈！我林俊軒絕對唔會放水嘅！就算報嘅項目唔同都好，我都一定要攞到牌！」俊軒先向主攻大路短跑項目嘅禮謙下戰書。
 
「咁又點呀林俊軒？！雖然你已經得到小喬，但我都開始有另外嘅新目標！所以，我都一定會盡力跑贏班Form 6！」喺口水戰裏面，禮謙當然都唔會輸畀俊軒。
 




「哈！我就聽住先啦！你地兩個唔好一陣間又好事之前咁，為咗可以得到喬喬而反面喎！」天殷笑笑口咁舊事重提，搞到兩個男仔完全駁唔到。

至於喺一邊嘅韻喬，就好輕鬆咁微微一笑道「喂！你又成日提住我同小軒拍拖嘅事做咩啫！？乜你依家真係好幸拍拖咩李天殷！？」
 
天殷聽到之後紅都面哂「唔係呀喬喬，咁係因為之前佢地兩個，為咗爭住做你男朋友啊嘛，搞到反哂面咁。我就係怕呢兩日又會發生呢啲事咋！」俊軒同禮謙都對被爆過去爭女嘅“醜態”而感到無奈。

不過，有俊軒愛情滋潤嘅韻喬，就唔同講法啦「哈！佢地兩個經過上次之後，乜你覺得佢地兩個仲夠膽搞咁多嘢咩？係咪呀，林俊軒同學？！」

韻喬喺講最後幾隻字嘅時候，刻意拉高自己嘅聲調，同時都斜視俊軒。





俊軒見到韻喬個樣之後，就即刻好似隻貓咁，對韻喬唯命是從「係係係……」

天殷見到俊軒對韻喬唯唯諾諾咁樣，就喺度嘲笑俊軒「你睇下你啊林俊軒，正一老婆奴嚟咖，睇死你以後都振唔到夫綱！好啦，我地入去運動場啦，一陣再見啦！」
 
天殷之所以咁講，係因為喺四個人裏面，得俊軒同韻喬同一個社，但天殷同禮謙就唔同社。喺以前未同韻喬一齊嘅時候，俊軒會喺陸運會搵禮謙吹水。

但今年因為俊軒要照顧韻喬呢個女朋友，所以禮謙就去咗同天殷隔住條巷吹水，廢事阻住俊軒同韻喬兩“公婆“喺度拍拖，同時都唔想畀俊軒同韻喬兩個喺度閃盲自己。
 
而當大部分嘅同學都喺看台上就坐之後，陳校長就準備發言。

不過，其實校長發言每年嚟嚟去去都係嗰啲廢話，所以俊軒同韻喬就算係模範生都好，佢地都會選擇無視。

「嗱！呢個係整畀你嘅愛心早餐，小喬！係你男朋友我今朝一早起身親手製作嘅！」

（待續 ~）





IG link https://instagram.com/bear_big_big_writer 
Threads https://www.threads.net/@bear_big_big_writer